مودی کی گیارنٹی فیل ہو گئی: گہلوت

   

جودھپور: راجستھان کے وزیر اعلی اشوک گہلوت نے وزیر اعظم نریندر مودی کی گارنٹی کو ناکام قرار دیتے ہوئے دعویٰ کیا کہ ریاست میں جس طرح کا ماحول ہے اس سے ظاہر ہوتا ہے کہ دوبارہ کانگریس کی حکومت بننے جا رہی ہے ۔ اسمبلی کے عام انتخابات-2023 میں جودھپور کے سردار پورہ حلقہ سے کانگریس کے امیدوار اشوک گہلوت نے آج اپنے ووٹ کا استعمال کرنے کے بعد میڈیا سے بات کرتے ہوئے یہ دعویٰ کیا۔ انہوں نے کہا کہ خواتین اور نوجوانوں سمیت تمام رائے دہندگان ووٹ ڈالنے کے لیے پرجوش ہیں اور لہر چل رہی ہے ۔ ایک سوال کے جواب میں انہوں نے کہا کہ کانگریس کے دعوے ٹھوس ہیں جبکہ بی جے پی کے دعوے کھوکھلے ہیں۔ ہماری گارنٹیاں کام آئیں گی جب کہ مودی کی گارنٹی فیل ہوچکی ہے ۔ اس لیے ان کی ضمانتوں پر کہیں بھی بات نہیں ہو رہی ہے ۔ وزیر اعلیٰ نے کہا کہ ریاست کی اسمبلی انتخابی مہم کے دوران بی جے پی کے بہت سے لیڈران بشمول مسٹر مودی، مرکزی وزیر داخلہ امت شاہ، متعدد مرکزی وزراء، مختلف ریاستوں کے وزرائے اعلیٰ راجستھان آئے ، لیکن یہاں کے مسائل پر کسی لیڈر نے بات نہیں کی۔ ان سب نے لوک سبھا انتخابات کی طرح مہم چلائی۔ قبل ازیں مسٹر گہلوت نے اپنے خاندان کے ساتھ سردار پورہ اسمبلی حلقہ میں واقع پولنگ بوتھ پر اپنا ووٹ ڈالا۔ اس موقع پر ان کی اہلیہ سنیتا گہلوت، بیٹے ویبھو گہلوت، بہو ہمانشو گہلوت نے بھی اپنا ووٹ ڈالا۔ اپنا ووٹ ڈالنے سے پہلے ، گہلوت نے اپنی بڑی بہن کا آشیرواد لیا اور اپنے خاندان کے ساتھ پولنگ اسٹیشن پہنچے ۔ اپنا ووٹ ڈالنے کے بعد شری ویبھو گہلوت نے کہا کہ اس بار ریاست میں روایت بدل رہی ہے اور کانگریس کی حکومت دہرائی جائے گی۔