12 مارچ کو بنگلورو ۔میسور ایکسپریس وے اور انڈین انسٹی ٹیوٹ آف ٹیکنالوجی کے پروگرام پربھی کانگریس کا اعتراض
بنگلورو۔ وزیر اعظم نریندر مودی 12 مارچ کو بنگلورو ۔میسور ایکسپریس وے اور دھارواڑ میں انڈین انسٹی ٹیوٹ آف ٹیکنالوجی (آئی آئی ٹی) کیمپس کو وقف کرنے کے لیے کرناٹک کا دورہ کرنے والے ہیں۔ پی ایم مودی مختلف ترقیاتی پروگراموں کے لیے اس سال پہلے ہی پانچ بار انتخابی ریاست کا دورہ کر چکے ہیں۔ وہ عوامی ریلیوں اور روڈ شوز میں شرکت کر رہے ہیں۔ کانگریس پارٹی نے پی ایم مودی، مرکزی وزیر داخلہ امیت شاہ اور مرکزی وزیر دفاع راج ناتھ سنگھ سمیت مرکزی قائدین کے بار بارکرناٹک کے دوروں پر اعتراض کیا ہے۔ سدارامیا نے اتوارکو مطالبہ کیا کہ ریاست میں ضابطہ اخلاق کو فوری طور پر نافذکیا جائے۔ سدارامیا نے الیکشن کمیشن سے انتخابات کی تاریخ کا اعلان کرنے پر بھی زور دیا ہے۔ انہوں نے مزید کہا کہ ہم اس سلسلے میں ای سی کو ایک میمورنڈم پیش کریں گے۔ بدعنوانی اور قانون کی خلاف ورزی کو روکنے کے لیے فوری طور پر ماڈل کوڈ آف کنڈکٹ کا اعلان کیا جائے۔ ریاستی حکومت پی ایم مودی، امیت شاہ اور راج ناتھ سنگھ کے پروگرام منعقد کرکے عوامی فنڈزکا غلط استعمال کر رہی ہے۔ سدارامیا نے الزام لگایا کہ پارٹی سازگار میڈیا رپورٹس اورکوریج حاصل کرنے کے لیے کروڑوں روپئے خرچ کر رہی ہے۔ وزراء ٹھیکیداروں سے رشوت لے رہے ہیں اور ٹینڈر مختص کررہے ہیں۔ بی جے پی کے امیدوار لوگوں میں تحائف اور نقد رقم تقسیم کر رہے ہیں۔ اس سب کو روکنے کے لیے، الیکشن کمیشن کو ریاست میں انتخابی تاریخوں اور ماڈل کوڈ آف کنڈکٹ کا اعلان کرنا چاہیے۔ سدارامیا نے یہ بھی انتباہ دیا کہ ٹھیکیداروں کو ہوشیار رہنا چاہئے کیونکہ ان کی پارٹی کے اقتدار میں آنے کے بعد، پچھلے چھ ماہ کے تمام ٹینڈر منسوخ کر دیے جائیں گے۔ اسکولی بچوں، آنگن واڑی کارکنوں کو پی ایم مودی کی ریلیوں میں لازمی طور پر شرکت کرنے کا حکم دیا گیا ہے۔ ان کو تنخواہ بھی نہیں دی جاتی ہے۔ کان، کوئلہ اور پارلیمانی امور کے مرکزی وزیر پرہلاد جوشی نے کہا کہ پی ایم مودی12 مارچ کو ریاست کے دو بڑے پروجیکٹوں، بنگلورو ۔ میسور ہائی وے اور دھارواڑ آئی آئی ٹی کو شروع کریں گے۔ پی ایم مودی منڈیا میں ایکسپریس وے کے بعد دھارواڑ پہنچیں گے۔ اس سلسلے میں مودی کے شیڈول کی تصدیق ہوگئی ہے۔ کانگریس لیڈر پی ایم مودی کے دورے سے خوفزدہ ہیں۔ 2018 میں، ان کی پارٹی کو شکست ہوئی تھی۔ نریندر مودی کے پی ایم کے طور پر عہدہ سنبھالنے سے پہلے سدارامیا نے 2013 میں الیکشن جیتا تھا۔ سدارامیا نے پی ایم مودی کے خلاف نامناسب زبان استعمال کی اور 2018 کے انتخابات میں شکست کا مزہ چکھ لیا۔
’صحت اور طبی تحقیق‘ پر پیر کونریندر مودی کا خطاب
نئی دہلی : وزیر اعظم نریندر مودی پیر کو ‘صحت اور طبی تحقیق’ پر ایک ویبینار سے خطاب کریں گے ، جس میں صحت کے شعبے کے لیے مرکزی بجٹ 2023-24 میں اعلان کردہ اسکیموں اور پروگراموں پر غور کیا جائے گا۔مرکزی وزارت صحت اور خاندانی بہبود نے اتوار کو یہاں کہا کہ ویبینار میں صحت اور فارما دونوں شعبوں پر بیک وقت تین سیشن ہوں گے ۔ مرکزی حکومت کی متعلقہ وزارتوں اور محکموں کے وزراء اور سکریٹریوں کے علاوہ ریاستی اور مرکز کے زیر انتظام علاقوں کی حکومتوں کے محکمہ صحت کے کئی اسٹیک ہولڈرز، ماہرین، صنعتی انجمنوں کے نمائندے ، پرائیویٹ میڈیکل کالج، اسپتال، ادارے وغیرہ ویبینار میں شرکت کریں گے ۔یہ ویبینار مرکزی حکومت کے 12 پوسٹ بجٹ ویبینارز کی سیریز کا ایک حصہ ہے جس کا مرکزی بجٹ میں اعلان کردہ اقدامات کو مؤثر طریقے سے نافذ کرنے کے لیے بصیرت، خیالات اور تجاویز ہیں۔مرکزی بجٹ 2023-24 کو سات ترجیحات میں بیان کیا گیا ہے جو ایک دوسرے کی تکمیل کرتی ہیں اور امرت کال کے ذریعے ‘سپترشی’ کے طور پر کام کرتی ہیں۔ جامع ترقی حکومت کی ترجیحات میں سے ایک ہے جس میں 157 نئے نرسنگ کالجوں کا قیام، آئی سی ایم آر لیبارٹریوں میں سرکاری اور نجی طبی تحقیق کی حوصلہ افزائی اور طبی آلات کے لئے فارما انویشن اور کثیر الضابطہ کورسز شامل ہیں۔