بھوپال : آل انڈیا مسلم پرسنل لا بورڈ کا 28 واں اجلاس اندور مدھیہ پردیش کے جامعہ اسلامیہ مہو بنجاری میں منعقد ہوا ۔ موصولہ اطلاعات کے مطابق آج کے اجلاس کی پہلی نشست سکریٹری بورڈ مولانا عتیق بستوی کی صدارت میں بعد نماز عصر شروع ہوئی۔ پہلی نشست خطبہ استقبالیہ سمیت تجاویز ، تعزیت، بورڈ کی سابقہ کارروائی کی تصدیق اور اڈیشہ ٹرین حادثہ پر اظہار افسوس کے ساتھ اختتام پذیر ہوئی۔بعد نماز مغرب دوسری نشست کا آغاز ہوا، جس کی صدارت مفتی ایولہ نے کی۔ اس اجلاس میں مولانا خالد سیف اللہ رحمانی نے رپورٹ پیش کی۔ مولانا رابع حسنی ندوی (سابق صدر آل انڈیا مسلم پرسنل لا بورڈ) کے سانحہ ارتحال کی وجہ سے خالی جگہ کو پر کرنے کیلئے بورڈ کے نئے صدر کا انتخاب عمل میں آیا۔اندور سے موصولہ اطلاعات کے مطابق بورڈ کی صدارت کے لئے مولانا محمد سفیان قاسمی (مہتمم دارالعلوم موقف دیوبند) کی جانب سے مولانا خالد سیف اللہ رحمانی کا نام پیش کیا گیا ہے، جس کی بروقت تائید مولانا شاہد حسنی ، مولانا سید محمود مدنی نے کی۔ اس کے بعد اتفاق رائے سے سبھی عاملہ کے اراکین نے مولانا خالد سیف اللہ رحمانی کو بورڈ کا پانچواں صدر منتخب کرلیا۔اجلاس میں مولانا فضل رحیم مجددی، مولانا سفیان قاسمی، امیر شریعت مولانا احمد ولی فیصل رحمانی، نظام الدین فخرالدین پونہ، ڈاکٹر ظہیر قاضی، ڈاکٹر ضی الاسلام ندوی، مولانا شاہد حسنی، مولانا سجاد نعمانی، مولانا محمود مدنی، مولانا محمود احمد خاں دریابادی، مولانا عمرین محفوظ رحمانی، مولانا نعیم رحمانی سمیت دیگر عاملہ اراکین ومدعوئین موجود تھے۔حیدرآباد سے اجلاس میں شریک ہونے والوں میں مولانا حسام الدین ثانی جعفر پاشاہ ، مولانا سید متین قادری ، جناب ضیا الدین نیر ، ڈاکٹر مشتاق علی اور مولانا مسعود حسین مجتہدی شامل ہیں ۔
