نئی دہلی : سابق ایم پی عتیق احمد اور اس کے بھائی محمد اشرف کے پولیس حراست میں قتل پر مولانا خلیل الرحمن سجاد نعمانی صاحب کا ایک آڈیو سوشیل میڈیا پر وائرل ہورہا ہے جسے اب بعض نیوز چینلز بھی دکھارہے ہیں اور اس میںمولانا کے بیان کی نسبت مسلم پرسنل لا بورڈ سے کی جارہی ہے اور کہا یہ جارہا ہے کہ مسلم پرسنل لا بورڈ کے سینئر اور مجلس عاملہ کے ایک اہم رکن نے عتیق احمد اور محمد اشرف کو شہید کہا اور ان کیلئے دعائے مغفرت کی ۔ رکن مجلس عاملہ آل انڈیا مسلم پرسنل لا بورڈ ڈاکٹر سید قاسم رسول الیاس نے اپنے پریس نوٹ میں کہا کہ مسلم پرسنل لا بورڈ کا موضوع، پرسنل لا اور عائلی مسائل ہیں نیز مسلمانوں کے انتہائی اہم دینی معاملات تک ہی بورڈ نے خود کو محدود کر رکھا ہے اور بورڈ اپنے دستورکی روشنی میں ہی کام کرتاہے ۔ مولانا سجادہ صاحب کے اس بیان کو ان کا ذاتی بیان سمجھا جانا چاہیئے اور کسی بھی نیوز چینل کو بغیرتحقیق کے بورڈ کی طرف منسوب نہیں کرنا چاہیئے ، ویسے بھی یہ بورڈ کا موضوع نہیںہے لہذا اس کو بورڈ سے وابستہ نہ کیا جائے۔
