نئی دہلی۔ 2 ۔جون (سیاست ڈاٹ کام) ہندوستانی معیشت کو بہتر بنانے کے حکومتی اقدامات پر بین الاقوامی ریٹنگ ایجنسی موڈیز کی طرف سے تبصرہ کیے جانے کے بعد کانگریس کے سابق صدر راہول گاندھی نے وزیر اعظم نریندر مودی کو نشانہ بناتے ہوئے کہا کہ وہ معیشت کے محاذ پر مکمل طور پر ناکام ہوچکے ہیں۔ راہول نے منگل کے روز ٹویٹ کیا کہ “مودی حکومت ہندوستانی معیشت کو سنبھالنے کے لئے جو کوششیں کر رہی ہیں، ریٹنگ ایجنسی موڈیز نے انہیں فضلہ یعنی کچڑے کے درجہ سے صرف ایک قدم اوپر قرار دیا ہے “۔ غریبوں اور خورد، چھوٹی و درمیانی صنعتوں کو مدد نہیں ملنے کامطلب یہ ہے کہ آنے والے دنوں میں صورتحال بہت خراب ہونے والی ہے ۔بعد میں کانگریس کے ترجمان سنیل جاکھڑ نے پریس کانفرنس میں راہول کے تبصرے کے بارے میں پوچھے گئے سوال پر کہا کہ گاندھی نے سچائی کو سامنے رکھ دیا ہے ۔ اس میں کچھ بھی غلط یا شک نہیں ہے ۔ حکومت کی قیادت مغرور ہاتھوں میں ہے اور اسے کانگریس اسی طرح سے اصلیت کی تصویر دکھاتی رہے گی۔ عالمی ریٹنگ ایجنسی موڈیز نے پیر کے روز ہندوستان کی معیشت سے متعلق اپنی رپورٹ میں اسے’’بہت خراب حالت ‘‘قرار دیا ہے۔