25میٹرپسٹل شوٹنگ
فائنل میں 22 سالہ
انڈین اسٹار کو چوتھا مقام
پیرس: ہندوستانی خاتون نشانے باز منو بھاکر کا پیرس اولمپکس 2024 میں تمغوں کی ہیٹ ٹرک کرنے کا خواب پورا نہ ہو سکا۔ بھاکر کو اولمپکس میں ہفتہ کو ویمنس25میٹر پسٹل فائنل میں 28 پوائنٹس کے ساتھ چوتھے مقام پر مطمئن ہونا پڑا۔ اس ایونٹ کا گولڈ میڈل عالمی نمبر 2 جمہوریہ کوریا کی یانگ جن کے حصے میں آیا، جب کہ تین بار ورلڈ کپ گولڈ میڈل جیتنے والی شوٹر فرانس کی کیملی جیڈرزیوسکی نے چاندی اور ہنگری کی میجر ویرونیکا نے کانسے کا تمغہ جیتا۔ 22 سالہ بھاکر پہلے مرحلے کے بعد دوسرے نمبر پر تھی ، وہ ساتویں مرحلے کے اختتام تک تمغے کی دعوے دار رہی۔ لیکن آٹھویں سیریز میں اپنے پانچ میں سے صرف دو شاٹس (10.2یا اس سے زیادہ اسکور کرنا ) کے بعد بھاکر ٹاپ تھری کیلئے شوٹ آف میں چلی گئیں جہاں ہنگری کی ویرونیکا میجر نے نئی انڈین اسٹار کو باہر کر دیا۔ کوریا ئی یانگ جن نے 37کے اسکور پر طلائی تمغہ جیتا جو اولمپک ریکارڈ کی برابری سے صرف ایک پوائنٹ کم ہے ۔ فرانسیسی شوٹر کیملی کو 10ویں سیریز کے بعد شوٹ آف کے نتیجہ میں چاندی کے تمغہ پر اکتفا کرنا پڑا۔ منو بھاکر پہلے ہی پیرس اولمپکس میں دو برانز جیت کر تاریخ رقم کر چکی ہیں۔ بھاکر نے 10میٹر ایئر پسٹل انفرادی اور مکسڈ ٹیم ایونٹس میں پوڈیم فنش کیا تھا۔ ہریانہ کی بھاکر اولمپکس میں دو تمغے جیتنے والی پہلی ہندوستانی شوٹر بنی ہے۔ آج ہفتہ کو پورا ملک ان کے تیسرے تمغے کی توقع کر رہا تھا مگر مسابقت سے اخراج والے راؤنڈ کے بعد وہ صرف آخری چار میں جگہ بنا سکی۔
