کاماریڈی ۔21 ستمبر (سیاست ڈسٹرکٹ نیوز) دین اسلام کی تعلیمات کے فروغ اور نئی نسل میں دینی شعور بیدار کرنے کے لئے مسجد نور، کاماریڈی میں حافظ محمد فہیم الدین منیری کی سرپرستی میں مکاتب ِ قرآنیہ کے طلباء کے درمیان دینی مسابقہ منعقد ہوا جس میں مختلف مکاتب سے وابستہ طلباء نے شرکت کی۔ اس علمی مقابلے میں طلباء نے قرآن کریم کی تلاوت مع تجوید، نورانی قاعدہ، اسلامی معلومات، کلماتِ اسلام و دعائیں تحریری مقابلہ (کتابت حروف) میں اپنی صلاحیتوں کا مظاہرہ کیا، خصوصاً چھوٹے بچوں کی رواں تجوید اور دینی معلومات میں مہارت نے اساتذہ، والدین اور منتظمین کو بے حد خوش کیا۔ مقابلے کے اختتام پر کامیاب طلباء کو پیش بہا انعامات اور تمام شرکاء کو ترغیبی انعامات سے نوازا گیا تاکہ بچوں میں مطالعے اور علم سے تعلق کو فروغ ملے۔ اساتذہ نے طلباء کی علمی تیاری کے ساتھ انتظامی امور کو بھی خوش اسلوبی سے سنبھالا، والدین نے پروگرام کی تعریف کی اور ایسے دینی و تربیتی سرگرمیوں کے تسلسل پر زور دیا تاکہ نئی نسل کی دینی بنیادیں مضبوط ہوں۔ مولانا محمود اشاعتی، حافظ محمد خواجہ یاسین حلیمی نے مسابقے میں حکم (ججس) کے فرائض انجام دیئے۔ اسی طرح مولانا منظور عالم مظاہری، مولانا نظرالحق قاسمی، قاری مجاہد صدیقی، حافظ محمد عبدالرحمن منیری، حافظ محمد تقی الدین منیری، محمد فصیح الدین نے مکمل انتظامی امور میں اہم کردار ادا کیا۔
