نیویارک۔ امریکہ میں صحت کے حکام کا کہنا ہے کہ ’ویکسین کی مکمل خوراکیں لینے والے افراد میں ان لوگوں کی نسبت جن کی ٹیکہ اندازی نہیں ہوئی، کورونا وائرس سے ہلاک ہونے کا خطرہ 11 گنا کم اور ہاسپٹل میں داخل ہونے کے امکانات 10 گنا کم ہو جاتے ہیں۔ فرانسیسی خبر رساں ایجنسی اے ایف پی کے مطابق امریکہ میں کورونا وائرس کا ڈیلٹا ویریئنٹ بہت عام ہو چکا ہے، بیماری سے بچاو اور روک تھام کے مرکز کی جانب سے شائع ہونے والے تین نئے صفحات کے ڈیٹا میں ویکسین کی افادیت کو اجاگر کیا گیا ہے۔ ڈیٹا کے مطابق موڈرنا ویکسین ڈیلٹا کی قسم سے زیادہ تحفظ فراہم کرتی ہے تاہم اس کی وجوہات ابھی پوری طرح سامنے نہیں آسکیں۔یہ تحقیق صدر جو بائیڈن کی اعلان کردہ اس حکمت عملی کے بعد سامنے آئی ہے جس میں 100 یا اس سے زیادہ ملازمین رکھنے والی کمپنیوں کو پابند کیا گیا ہے کہ یا تو وہ اپنے عملے کی ٹیکہ اندازی کرائیں یا ہر ہفتے ان کا ٹسٹ کرائیں۔ سینٹر فار ڈیزیز کنٹرول اینڈ پریوینشن کے ڈائریکٹر روچیل والینکسی نے ایک پریس بریفنگ میں بتایا کہ جیسا کہ ایک کے بعد ایک تحقیق میں ہم دیکھ رہے ہیں کہ ویکسی نیشن (کورونا کے خلاف) کام کر رہی ہے۔پہلی تحقیق میں یہ بات سامنے آئی تھی کہ 4 اپریل سے 19 جون کے درمیان 13 علاقوں میں لاکھوں کیسز رپورٹ ہوئے۔ یہ کیسز ڈیلٹا ویریئنٹ سے قبل سامنے آئے تھے جن کا 20 جون سے 17 جولائی تک موازنہ کیا گیا۔اس عرصے کے دوران ویکسین لگوانے والے ایک شخص میں کورونا سے متاثر ہونے کا امکان بڑھا یعنی اس وائرس سے متاثر ہونے کا خطرہ جو ویکسین نہ لگوانے والے افراد سے 11 گنا کم تھا جو بعد میں پانچ گنا کم ہوگیا۔ جون سے اگست تک کے جائزے پر مبنی ایک اور تحقیق میں اس وبا کا شکار ہو کر اسپتال میں داخل ہونے والوں کا ڈیٹا اکٹھا کیا گیا جس میں یہ بات آئی کہ ویکسین لگوانے والوں کے اسپتال میں داخل ہونے کے امکانات بہت کم تھے۔ موڈرنا کی افادیت 95 فیصد جبکہ فائزر کی 80 اور جانسن اینڈ جانسن کی 60 فیصد تھی۔
