مکہ مکرمہ ۔یکم مئی(سیاست ڈاٹ کام)سعودی افواج نے وزارت صحت کے تعاون سے مکہ مکرمہ کے علاقے کدئی میں 100 بستروں پر مشتمل فیلڈ ہسپتال قائم کر دیاہے۔دواخانہ میں ہنگامی بنیادوں پرکورونا وائرس کے مریضوں کو رکھا جائے گا، فیلڈ ہسپتال میں خصوصی طور پر آئیسولیشن وارڈز کا بھی اہتمام کیا گیاہے۔تفصیلات کے مطابق مکہ مکرمہ میں محکمہ صحت کے ترجمان حمد بن فحیان العتیبی نے بتایا کہ کدی کے علاقے میں عارضی بنیادوں پر قائم کیا جانے والا یہ فیلڈ ہسپتال گنجان آبادی والے محلوں کے قریب ہے جہاں غیرملکی کثیر تعداد میں سکونت پذیر ہیں۔العتیبی نے توجہ دلائی ہے کہ فیلڈ ہسپتال کی تیاری میں وزارت دفاع کے ماتحت طبی خدمات کے ادارے نے بھی حصہ لیا۔سعودی وزارت صحت نے اعلا ن کیا تھا کہ ان دنوں کورونا وائرس کے بیشتر واقعات یا تو گنجان آبادی والے علاقوں میں سامنے آرہے ہیں یا بیرونی ملازمین کی اجتماعی رہائش کے مراکزسے مل رہے ہیں۔سعودی حکومت بیرونی ممالک کے ملازمین کو اجتماعی رہائش کے مراکز سے ہوٹلوں، اسکولوں، عارضی رہائش کے محفوظ مراکز اور ایسے مقامات پر منتقل کرا رہی ہے جہاں سماجی فاصلے کے اصول پر عمل درآمد ہورہا ہے۔
