مکہ مکرمہ ۔23 نومبر ۔(سیاست ڈاٹ کام) تازہ ترین اعداد و شمار کے مطابق عرب دنیا میں ہوٹلوں کی تعداد کے لحاظ سے مکہ مکرمہ نے دوبئی کو پیچھے چھوڑتے ہوئے پہلی پوزیشن حاصل کر لی ہے۔ گذشتہ برسوں کے دوران اس درجہ بندی میں دوبئی سرفہرست رہا ہے۔ سعودی روزنامے ’مکہ‘ کے مطابق چیمبر آف کامرس اینڈ انڈسٹری کے چیئرمین ہشام کعکی نے بتایا کہ مکہ مکرمہ میں اب تک ہوٹلوں کی تعداد 1100 ہو چکی ہے جس کی وجہ سے مکہ مکرمہ عرب دنیا میں سرفہرست ہوگیا۔ مکہ مکرمہ کے ہوٹل سالانہ 1 کروڑ سے زیادہ افراد کی میزبانی انجام دیتے ہیں۔دوسری جانب مذکورہ چیمبر میں ہوٹل کمیٹی کے سربراہ عبداللہ فیلالی نے واضح کیا کہ مکہ مکرمہ چیمبر پہلی مرتبہ تیس سے زیادہ کمپنیوں کو اکٹھا کرنے میں کامیاب ہو گیا جنہوں نے مل جل کر ہوٹلوں کو تمام تر ضروریات اور لوازمات کی فراہمی یقینی بنائی۔
