بیروت۔ لبنان کے جنوب میں واقع فلسطینی مہاجر کیمپ میں اچانک تباہ کن آگ بھڑک اٹھی جسکے نتیجے میں 13 افراد کے جاں بحق ہونے کی اطلاع ہے ۔ لبنانی قومی خبر رساں ایجنسی کے مطابق دھماکے کے نتیجے میں متعدد افراد ہلاک اور زخمی ہوئے۔ العربیہ ؍ الحدث کے نمائندہ کا کہنا ہے کہ حادثہ میں 13 افراد اپنی جانوں سے ہاتھ دھو بیٹھے۔ کیمپ میں رہائش پذیر افراد کے مطابق یہ زور دار دھماکہ صور شہر کے قریب برج الشمالی کیمپ میں حماس کے زیر انتظام ایک مسجد کے نزدیک ہوا۔ دھماکے کے ساتھ ہی جائے مقام پر خوف ناک آگ بھڑک اٹھی۔ دوسری جانب فوجی ذرائع کا کہنا ہے کہ آگ بھڑکنے کی وجوہات ابھی تک واضح نہیں جبکہ فوجی ماہرین کا کہنا ہے کہ بیرونی دہشت گردی کے امکانات کو بھی رد نہیں کیا جاسکتا۔ کیمپ کے ایک ذمہ دار نے گودام میں گولہ بارود ہونے کی تردید کی ہے۔ ان کا کہنا ہے کہ گودام میں گیس کی بوتلیں اور آکسیجن سلنڈر موجود تھے۔
