کئی علاقوں میں سیلاب جیسی صورتحال‘ عوام کو شدید مشکلات کا سامنا
ممبئی: مہاراشٹرا کے رائے گڑھ کی کھالاپور تحصیل کے ارشل واڑی گاؤں میں مٹی کے تودے گرنے کے حادثہ میں مہلوکین کی تعداد بڑھ کر 22 ہو گئی ہے ۔ کئی لوگ زخمی ہیں، جنہیں اسپتال میں داخل کرایا گیا ہے۔ درجنوں افراد تاحال لاپتہ ہیں جن کی تلاش جاری ہے۔ این ڈی آر ایف ٹیم کی جانب سے ریسکیو آپریشن جاری ہے۔لینڈ سلائیڈنگ چہارشنبہ کی رات ہوئی۔ قبائلی گاؤں ارشل واڑی پر 550 میٹر سے زیادہ اونچی پہاڑی کا ایک حصہ گر گیا تھا۔ جس کی وجہ سے 30تا40 جھونپڑیاں دب گئیں اور ان میں رہنے والے لوگ پھنس گئے۔ ارشل واڑی گاؤں کی آبادی 228 ہے جس میں سے 100 سے زائد لوگ اس سانحے سے متاثر ہوئے ہیں۔لینڈ سلائیڈنگ کی اطلاع ملنے کے بعد رائے گڑھ ضلع انتظامیہ اور پولیس، ایس ڈی آر ایف، این ڈی آر ایف کی ٹیمیں موقع پر پہنچ گئیں اور بڑے پیمانے پر بچاؤ آپریشن شروع کیا۔وزیر اعلیٰ ایکناتھ شندے نے جمعہ کو اسمبلی میں ایک بیان میں اعلان کیا کہ ریاست کے لینڈ سلائیڈنگ کے شکار علاقوں کے شہریوں کو محفوظ مقامات پر منتقل کرنے اور ان کی مستقل بحالی کا فیصلہ کیا گیا ہے۔ کابینہ کی میٹنگ میں رائے گڑھ ضلع میں ارشل واڑی حادثہ پر بحث ہوئی۔ وزیر اعلیٰ نے یہ بھی اعلان کیا کہ ارشل واڑی کے مکینوں کو سڈکو کے ذریعے مستقل طور پر آباد کیا جائے گا۔