ممبئی : /14 جنوری (یو این آئی) ممبئی سمیت مہاراشٹرا کے 29 میونسپل کارپوریشنوں کے انتخابات میں جمعرات /15 جنوری کو پولنگ ہوگی ۔ تمام تر سیاسی جماعتوں کی توجہ دارالحکومت کے شہری بلدیہ بریہن ممبئی میونسپل کارپوریشن (بی ایم سی) کے انتخابات پر مرکوز ہے ۔ ممبئی کے تمام 227 وارڈس میں ووٹنگ ہوگی ۔ جمعہ /16 جنوری کو ووٹوں کی گنتی کے بعد نتائج کا اعلان کیا جائے گا ۔ اس الیکشن میں ممبئی کے تقریباً ایک کروڑ 3 لاکھ سے زیادہ ووٹرس اپنے حق رائے دہی کا استعمال کریں گے ۔ ووٹنگ میں عوامی شرکت کو یقینی بنانے کیلئے متعلقہ علاقوں میں سرکاری تعطیل کا اعلان کیا گیا ہے ۔ شیئر بازار کی ٹریڈنگ معطل رہے گی ۔ الیکشن کمیشن نے شہریوں سے اپیل کی ہے کہ وہ اپنا نام ووٹر لسٹ میں ضرور چیک کریں اور اس کے بعد ہی پولنگ بوتھ پر جائیں ۔ کمیشن نے ممبئی کے مستقبل ، اس کی ترقی کیلئے ووٹ دینے کی اپیل کی ہے ۔
پونے میں ووٹ کیلئے واشنگ مشین اور چاندی کے برتن تقسیم
ممبئی۔ 14 جنوری (ایجنسیز) پونے اور قریبی علاقوں میں بلدیاتی انتخابات کے دوران ووٹروں کو راغب کرنے کیلئے انوکھی مگر غیر قانونی کوششوں کے واقعات سامنے آ رہے ہیں۔ پمپری چنچواڑ میونسپل کارپوریشن انتخابات کے دوران انتخابی فلائنگ اسکواڈ نے بڑی کارروائی کرتے ہوئے ووٹروں میں تقسیم کیلئے رکھی گئی 19 واشنگ مشینیں ضبط کر لیں۔الیکشن فلائنگ اسکواڈ کو موصول ہونے والی شکایت کے مطابق گنجراج کالونی، رہٹانی میں صبح تقریباً ساڑھے دس بجے ووٹروں میں واشنگ مشینیں تقسیم کی جا رہی تھیں۔ اطلاع ملتے ہی ٹیم نے فوری کارروائی کی اور موقع پر پہنچ کر تمام واشنگ مشینیں ضبط کر لیں۔ اس سلسلے میں کالے واڑی پولیس اسٹیشن میں شکایت درج کرائی گئی ہے اور مزید تفتیش جاری ہے۔انتخابی مہم کے اختتام کے باوجود ووٹنگ سے قبل کے آخری گھنٹوں میں ووٹروں کو بہلانے کے مختلف طریقے اختیار کیے جا رہے ہیں۔ اسی تناظر میں پونے اور پمپری چنچواڑ کے مختلف علاقوں میں ووٹروں کو راغب کرنے کیلئے چاندی کی اشیاء تقسیم کیے جانے کی اطلاعات بھی سامنے آئی ہیں، جن کی انتظامیہ کی جانب سے جانچ کی جارہی ہے۔پونے میونسپل کارپوریشن کے حلقہ نمبر 9 میں ضابطہ اخلاق کی مبینہ خلاف ورزی اور ووٹروں میں رقم تقسیم کرنے کا معاملہ بھی سامنے آیا ہے۔ مقامی شہریوں کا کہنا ہے کہ کچھ امیدواروں کے معاونین ووٹروں میں پیسوں کے لفافے تقسیم کرنے کی کوشش کر رہے تھے، جنہیں موقع پر موجود لوگوں نے رنگے ہاتھوں پکڑ لیا۔ تاہم سوالات کا سامنا کرنے کے بجائے یہ افراد وہاں سے فرار ہو گئے۔مہاراشٹر میں 29 میونسپل کارپوریشن انتخابات کیلئے انتخابی مہم کل شام اختتام پذیر ہو گئی ہے۔ تمام بڑی سیاسی جماعتوں کے امیدواروں نے آخری دن بھرپور مہم چلائی۔ ان تمام میونسپل کارپوریشنوں کیلئے کل ووٹنگ ہوگی، جبکہ ہموار اور پرامن پولنگ کو یقینی بنانے کیلئے ریاستی انتظامیہ نے سیکیورٹی اور انتظامی اقدامات مکمل ہونے کی تصدیق کی ہے۔