ممبئی:مہاراشٹرا کا حکمراں اتحاد ا ریاست میں بیلٹ پیپر کے ذریعہ انتخابات کروانے پر غور کررہا ہے اور اس سے متعلق بل ریاستی اسمبلی میں پیش کیا جا سکتا ہے۔ مہاراشٹرا اسمبلی کے اسپیکر نانا پٹولے نے انہیں بتایا کہ انہوں نے ادھو ٹھاکرے حکومت کو ای وی ایم کے ساتھ بیلٹ پیپر کے ذریعہ انتخابات کرانے کے لئے ایک ڈرافٹ تیار کرنے کے لئے کہا ہے۔ پٹولے نے مزید کہا کہ اگر ڈرافٹ تیار ہے تو بل بجٹ اجلاس میں پیش کیا جا سکتا ہے۔واضح رہے جو بل اسمبلی میں پیش کیا جائے گا اس کا تعلق صرف ریاستی اسمبلی اور مقامی یونٹس کے انتخابات سے ہی ہوگا۔ اگر ادھو ٹھاکرے حکومت اس پر غور کرکے آگے برھتی ہے تو مہاراشٹر ریاست میں بیلٹ پیپر اور ای وی ایم پر ایک ساتھ انتخابات کرائے جا سکتے ہیں۔پٹولے نے بتایا کہ آئین کے سیکشن 328 میں ایسے قانون بنانے کی اجازت دی گئی ہے اور حکمراں اتحاد کی تینوں پارٹیاں اس پر متفق نظر آ رہی ہیں۔ انہوں نے بتایا کہ اس تعلق سے انتخابی کمیشن کے افسران سمیت کئی دیگر لوگوں سے بات چیت ہو چکی ہے۔ انہوں نے کہا کہ جو لوگ جمہوریت میں یقین رکھتے ہیں اور جو لوگ بیلٹ پیپر میں یقین رکھتے ہیں وہ اس پیش رفت سے خوش ہوں گے۔واضح رہے حزب اختلاف ای وی ایم سے ہونے والے انتخابات پر اپنے تحفظات کا اظہار کر چکے ہیں اور ماضی میں کئی پارٹیوں نے بیلٹ پیپر سے چناو کرانے پر زور دیا ہے۔ الیکشن کمیشن اس بات کو کئی مرتبہ کہہ چکا ہے کہ ای وی ایم سے ہونے والے انتخابات میں کوئی گڑبری نہیں ہو سکتی۔ مہاراشٹر اسمبلی اگر یہ بل منظور کر لیتی ہے تو پھر مہاراشٹر میں ای وی ایم اور بیلٹ پیپر دونوں سے ایک ساتھ انتخابات کرائے جا سکتے ہیں۔
