ممبئی: مہاراشٹر کے وزیر اعلی ایکناتھ شندے نے کہا ہے کہ انتظامی کاموں کو مزید فعال اور پیپر لیس بنانے کیلئے ای۔آفس سسٹم کو ریاست کے تمام سرکاری دفاتر میں یکم اپریل 2023 سے لاگو کیا جائے گا۔ جمعرات کی رات جاری کردہ ایک سرکاری بیان میں کہا گیا ہے کہ مسٹر شندے نے انتظامیہ کو ہدایت دی ہے کہ وہ ریاست میں بھی مرکز کے خطوط پر فیصلے کرنے کے لیے سرکاری فائلوں کو چار سطحوں پر بھیجے ۔ مرکزی محکمہ انتظامی اصلاحات اور عوامی شکایات (ڈی اے آر پی جی ) کے سکریٹری وی سرینواس نے اس سلسلے میں ‘ورشا’ رہائش گاہ پر شندے سے ملاقات کی۔ ریاست کے چیف سکریٹری منو کمار سریواستو، ایڈیشنل چیف سکریٹری سوجاتا سونک اور دیگر سینئر افسران بھی موجود تھے ۔ وزیر اعلی نے انتظامیہ کو ریاست میں گڈ گورننس مینول کی تیاری میں تعاون کرنے کی ہدایت دی اور کہا کہ مہاراشٹرا ملک میں گڈ گورننس انڈیکس میں دوسرے نمبر پر ہے اور اسے پہلے مقام پر لانے کی کوشش کی جانی چاہئے ۔
