سات سو اکاونٹ میں 54کروڑ روپے کی رقم پر پابندی
نئی دہلی: محکمہ انکم ٹیکس نے مہاراشٹر میں قرض دینے والے ایک شہری کوآپریٹیو بینک پر چھاپہ مار کر منصوبہ بند طریقہ سے کھولے گئے 700سے زیادہ اکاونٹس کی شناخت کی ہے اور ان میں جمع کرائے گئے کل ملاکر 54کروڑ روپے پر پابندی لگا دی ہے ۔انکم ٹیکس محکمہ نے 27اکتوبر 2021کو اربن کریڈٹ کوآپریٹیو بینک کے ہیڈکوارٹر اور اس کی ایک برانچ پر چھاپہ مارکر تلاشی اور ضبطی کی کارروائی کی۔انکم ٹیکس محکمہ کے مطابق بینک کے صدر اور اس کے ڈائرکٹروں کی رہائش گاہوں کی بھی تلاشی لی گئی ہے ، صدر، چیف منیجنگ ڈائرکٹر اور برانچ منیجر بھی نقدی جمع کرنے کے ذریعہ کے بارے میں کوئی حساب نہیں دے سکے ۔ انہوں نے اعتراف کیا کہ یہ کام بینک کے ایک ڈائرکٹر کے کہنے پر کیا گیا۔ بینک کا یہ ڈائرکٹر اناج کا آڑتی ہے ۔انکم ٹیکس محکمہ کی سنیچر کو جاری ایک ریلیز کے مطابق گزشتہ سال اگست سے اس برس مئی کے درمیان منصوبہ کے تحت کھولے گئے ان اکاونٹس میں قواعد پر عمل نہیں کیا گیا۔ ان تمام اکاونٹس میں ہر ایک کے حساب سے 1.9 لاکھ روپے جمع کئے گئے تھے جن کی مجموعی رقم 53.72کروڑ روپے بنتی ہے ۔محکمہ نے کہاکہ بینک کی برانچوں کو ایک دوسرے سے جوڑنے والے کور بینکنگ سالیوشنس (سی بی ایس) کے بینک اعدادوشمار اور تلاشی کے دوران اہم لوگوں سے پوچھ گچھ کے تجزیہ سے معلوم ہوا کہ بینک اکاونٹس کھولنے میں بڑے پیمانہ پر بے ضابطگیاں کی گئی ہیں۔
محکمہ انکم ٹیکس نے بتایا کہ بغیر پین کارڈ کے بینک کی مذکورہ برانچ میں 1200سے زیادہ نئے اکاونٹس کھولے گئے ۔ تفتیش میں پتہ چلا کہ یہ تمام بینک اکاونٹ بغیر کے وائی سی کے قواعد پر عمل کئے کھولے گئے ہیں۔ اس کے علاوہ اکاونٹ کھولے جانے کے فارموں کو بینک کے اسٹاف نے ہی بھرا تھا اور انہیں لوگوں نے اپنے دستخط یا انگوٹھے کے نشان لگائے تھے ۔ان اکاونٹس میں 700سے زیادہ بینک اکاونٹس کی شناخت کرلی گئی ہے جو مرحلہ وار طریقہ سے کھولے گئے تھے ۔ ان تمام اکاونٹس میں 1.9لاکھ روپے ہر ایک میں جمع کئے گئے تھے جو کل ملاکر 53,72کروڑ روپے بیٹھتے ہیں۔ریلیز میں کہا گیا ہے کہ اکاونٹ کھولے جانے کے سات دن کے اندر ہی رقم ڈال دی گئی تھی او ر اگست سے مئی 2021کے درمیان ان اکاونٹس میں 34.10کروڑ روپے سے زیادہ کی رقم جمع کردی گئی تھی۔ یہ رقم اس طریقہ سے جمع کی گئی تھی کہ دو لاکھ سے زیادہ کی رقم جمع کرنے کے لئے پین کی لازمیت سے بچا جاسکے ۔ بعد میں اسی برانچ میں جمع کی گئی رقم کو فکسڈ ڈپازٹ میں تبدیل کردیا گیا۔کچھ معاملات میں اکاونٹ ہولڈروں جیسی مقامی تفتیش سے پتہ چلا کہ ان لوگوں کو بینک میں جمع رقم کے بارے میں کوئی معلومات نہیں ہے ۔ انکم ٹیکس محکمہ نے جمع کئے گئے ثبوتوں اور درج کئے گئے بیانات کی بنیاد پر 53.72کروڑ روپے کی رقم پر پابندی لگا دی ہے ۔