نئی دہلی: اہم اپوزیشن کانگریس اور دیگر پارٹیوں نے راجیہ سبھا میں دوپہر کے کھانے کے وقفے کے بعد بھی بڑھتی ہوئی مہنگائی، کچھ ضروری اشیاء پر اشیاء اور خدمات ٹیکس کے نفاذ اور اگنی پتھ اسکیم کے خلاف زبردست ہنگامہ کیا۔ جس کے باعث ایوان کی کارروائی کل تک ملتوی کر دی گئی۔پہلے التوا اور کھانے کے وقفے کے بعد جب ڈپٹی چیئرمین ہری ونش نے کارروائی شروع کرنے کی کوشش کی تو اپوزیشن اراکین نے ہنگامہ آرائی شروع کردی جس پر انہوں نے ایوان کی کارروائی کل تک ملتوی کردی۔صبح راجیہ سبھا میں رول 267کے تحت بحث کا مطالبہ کیا گیا جسے چیئرمین ایم وینکیا نائیڈو نے مسترد کر دیا۔ اس پر اپوزیشن اراکین پارلیمنٹ نے ہنگامہ آرائی کی جس کے باعث ایوان کی کارروائی دو بجے تک ملتوی کرنی پڑی تھی۔ایوان کی میز پر قانون سازی کے دستاویزات رکھے جانے کے بعد چیئرمین نے کہا کہ انہیں اپوزیشن لیڈراور دیگر قائدین کا نوٹس موصول ہوا ہے۔
راجیہ سبھا میں بھی مہنگائی پر کارروائی ملتوی
نئی دہلی : اپوزیشن نے مانسون اجلاس کے دوسرے دن منگل کو پارلیمنٹ میں مہنگائی کے معاملے پر زبردست ہنگامہ کیا جس کی وجہ سے ایوان کا کام نہیں ہوسکا اور کارروائی دن بھر کے لیے ملتوی کردی گئی۔کھانے کے وقفے کے بعد جیسے ہی پریذائیڈنگ آفیسر کریٹ سولنکی نے ایوان کی کارروائی شروع کی تو اپوزیشن کے اراکین نے ایوان کے وسط میں ہی ہنگامہ آرائی اور نعرے بازی شروع کردی اور ہاتھوں میں پلے کارڈ اٹھا رکھے تھے ۔ اراکین نے صبح بھی ہنگامہ آرائی کی جس کے باعث ایوان کی کارروائی دو بجے تک ملتوی کر دی گئی تھی۔ایوان میں شدید ہنگامہ آرائی کے درمیان پریذائیڈنگ آفیسر نے ضروری کاغذات ایوان کی میز پر رکھے ۔ انہوں نے اراکین پر زور دیا کہ وہ ہنگامہ آرائی نہ کریں اور کہا کہ وہ اپنی نشستوں پر جانے میں ان کی مدد کریں اور کارروائی کو پرامن طور پر چلنے دیں۔انہوں نے اراکین سے کہا کہ ایوان بحث کے لیے ہے۔
اور عوام نے انہیں ایوان میں اپنے مسائل اٹھانے کے لیے منتخب کیا ہے ، اس لیے اراکین پارلیمنٹ میں باوقار طریقے سے بحث میں حصہ لیں۔ اراکین پارلیمنٹ نے ان کی ایک نہ سنی اور ہنگامہ آرائی جاری رکھی جس پر انہوں نے ایوان کی کارروائی دن بھر کے لیے ملتوی کر دی۔
