نئی دہلی :ترنمول کانگریس کی رکن پارلیمنٹ مہوا موئترا آج پیسہ لے کر سوال پوچھنے کے الزام کے معاملہ پر اخلاقیات کمیٹی کے اجلاس میں شریک ہوئیں۔ اجلاس میں زبردست ہنگامہ ہوا جس کے بعد اپوزیشن پارٹیوں کے اراکین پارلیمنٹ نے اجلاس سے واک آؤٹ کر دیا۔ میڈیا کے مطابق اخلاقیات کمیٹی میں جس طرح کے سوالات پوچھے گئے اس سے وہ ناراض ہوکر مہوا موئترا بھی میٹنگ سے باہر آگئیں۔اخلاقیات کمیٹی کی میٹنگ میں شامل بی ایس پی رکن پارلیمنٹ دانش علی کا الزام ہے کہ چیئرمین اور بی جے پی رکن پارلیمنٹ ونود کمار سونکر ‘ مہوا موئترا سے غیر اخلاقی سوال پوچھ رہے تھے۔ اس وجہ سے میٹنگ کے دوران ہنگامہ شروع ہو گیا اور پھر وہ میٹنگ ہال سے باہر نکل گئیں۔میٹنگ کے بعد کی جو ویڈیوز سامنے آئے ہیں اس میں اپوزیشن اراکین پارلیمنٹ کافی غصے میں دکھائی دے رہے تھے۔ اخلاقیات کمیٹی کے رکن دانش علی کے مطابق موئترا سے سوال پوچھا جا رہا تھا کہ رات میں کس سے بات ہوئی تھی؟ کون کس کے ساتھ بات کرتا ہے، کیا بات کرتا ہے؟ ایک خاتون کے ساتھ غیر اخلاقی سوال کیے جا رہے تھے جو مناسب نہیں۔واضح رہے کہ اخلاقیات کمیٹی میں 15 اراکین ہوتے ہیں جن کو لوک سبھا اسپیکر کے ذریعہ منتخب کیا جاتا ہے۔ اس کمیٹی نے آج مہوا موئترا معاملے میں میٹنگ کی اور ذرائع کے حوالے سے یہ خبریں سامنے آ رہی ہیں کہ میٹنگ میں موئترا لگاتار کہہ رہی تھیں کہ پورا معاملہ ان کا ذاتی ہے۔ اس معاملے پر کمیٹی میں بحث کی ضرورت نہیں ہے۔ موئترا نے سوال اٹھاتے ہوئے پوچھا کہ ذاتی طور پر ان کو ان کے کسی دوست سے تحفہ ملتا ہے تو یہ معاملہ اخلاقیات کمیٹی کے سامنے کیسے لایا جا سکتا ہے۔
