l ایتھکس کمیٹی کے اجلاس میں 6ارکان کی حمایت‘ 4نے مخالفت کی
lقطعی فیصلہ کیلئے رپورٹ آج اسپیکر لوک سبھا کو پیش کی جائے گی
نئی دہلی :ترنمول کانگریس کی رکن پارلیمنٹ مہوا موئترا کی مشکلات میں اضافہ ہوگیا ہے۔ ان پر پارلیمنٹ میں سوال پوچھنے کیلئے پیسے لینے کا الزام ہے۔ اس معاملے میں ایتھکس (اخلاقی) کمیٹی کا اجلاس 9 نومبر کو ہوا ۔ کمیٹی کے دس میں سے چھ ارکان نے مہوا کو لوک سبھا سے نکالنے کے حق میں ووٹ دیا۔ 4 ارکان نے مخالفت میں ووٹ دیا۔پینل کے سربراہ ونود سونکر نے یہ اطلاع دی۔ ذرائع کا کہنا ہے کہ اخلاقیات کمیٹی نے مہوا موئترا کو لوک سبھا سے نکالنے کی سفارش کی ہے۔ذرائع کے مطابق یہ رپورٹ جمعہ 10 نومبر کو لوک سبھا اسپیکر اوم برلا کو پیش کی جائے گی۔ ہمارا ایجنڈا صرف رپورٹ کو قبول کرنا تھا۔ اس پر حتمی فیصلہ صرف اسپیکر برلا ہی لیں گے۔ اس کے ساتھ ہی مہوا موئترا کے اخراج کی مخالفت کرنے والے کمیٹی کے چار ارکان نے رپورٹ کو جانبدارانہ اور غلط قرار دیا۔قابل ذکر ہے کہ بی جے پی ایم پی ونود کمار سونکر کی صدارت میں اخلاقیات کمیٹی کی جمعرات کومیٹنگ ہوئی جس میں رپورٹ کو منظور کر لیا گیا۔پنجاب کے سابق وزیر اعلی امریندر سنگھ کی اہلیہ کانگریس ایم پی پرنیت کور نے رپورٹ کی حمایت میں ووٹ دیا ہے۔واضح رہے کہ موئترا پر کیش فار استفسار کا الزام ہے۔ٹی ایم سی ایم پی مہوا موئترا کے خلاف استفسار کیلئے نقد رقم کے الزامات پر ایتھکس کمیٹی کے چیئرمین ونود سونکر نے کہا ہے کہ ایتھکس کمیٹی نے مہوا موئترا کے خلاف الزامات پر ایک رپورٹ تیار کی ہے۔ کل لوک سبھا کے اسپیکر کو تفصیلی رپورٹ پیش کی جا رہی ہے۔ مہوا موئترا کے معاملے میں بی جے پی ایم پی اور پارلیمنٹ ایتھکس کمیٹی کی ممبر اپراجیتا سارنگی نے کہا ہے کہ کانگریس ایم پی پرنیت کور نے سچائی کا ساتھ دیا ہے۔بی ایس پی ایم پی اور ایتھکس کمیٹی ممبر دانش علی نے کمیٹی کے چیئرمین ونود سونکر اور بی جے پی ممبران پر کارروائی کو لیک کرنے اور قواعد کی خلاف ورزی کرنے کا الزام لگایا۔ دانش نے یہ بھی کہا کہ کمیٹی نے مہوا کے حوالے سے سخت سفارشات کی ہیں۔