لاہو۔ جاوید میانداد بھی سرفراز احمد کو جوتے لے کر میدان میں بھیجنے پر ناراض ہیں۔ پاکستانی ٹیم کے سابق کپتان جاوید میانداد نے کہا کہ30 کھلاڑی ساتھ لے کرگئے ہیں، اس کے باوجود چمپئنز ٹرافی2017 کے فاتح کپتان اورسینئرکھلاڑی کو پانی اور جوتے لے کر میدان میں بھیج کرکیا پیغام دیا گیا، دوسرے ملکوں کی تہذیب مختلف ہے ہمارے یہاں سینئرکا احترام کیا جاتا ہے ۔انھوں نے کہا کہ اولڈ ٹریفورڈ ٹسٹ میں انگلینڈ کی دوسری اننگز شروع ہوئی تو پاکستان کو اسپنرز سے بولنگ کروانا چاہیے تھی، میزبان ٹیم کو 1،1 رن حاصل کرنے میں دشواری ہوتی، میں نے ٹیم کو پیغام بھجوانے کی کوشش بھی کی لیکن انگلینڈ میں کاپی پینسل والے کوچ ساتھ ہیں،کسی نے نہیں سنی، اگر کسی کے پاس عملی تجربہ ہے تو اسے میدان میں آزمانے سے ہی بات بنتی ہے ۔ بہر حال ابھی بھی سیریز ختم نہیں ہوئی، غلطیوں سے سبق سیکھ کر واپسی ہوسکتی ہے ۔میانداد نے کہا ہے کہ ناتجربہ کاری کی وجہ سے انگلینڈ کے خلاف پاکستان جیتا ہوا میچ ہارگیا۔
