کراچی ۔28 مارچ (سیاست ڈاٹ کام ) پاکستان کرکٹ ٹیم کے سابق کپتان وقار یونس نے اپنی اہلیہ ڈاکٹر فریال کو کورونا کے خلاف جنگ میں اپنا کردار ادا کرنے پر خراج تحسین پیش کیا ہے۔سماجی رابطے کی ویب سائٹ ٹوئٹر پر وقار یونس نے فریال کی ماسک اورکورونا سے بچاؤ کے لیے فراہم کیا گیا طبی یونیفارم پہنے ایک تصویر شائع کی اور ساتھ ایک جذباتی پیغام بھی لکھا۔ وقار یونس نے اپنے سوشل میڈیا پیغام میں لکھا کہ فریال کو دواخانہ جاتا دیکھ کر ڈرگیا تھا لیکن واپس آتا دیکھ کرسکون ہوا۔ انہوں نے مزید لکھا کہ میں فخر سے کہہ سکتا ہوں کہ میری بیوی ہیرو ہے۔ وقار یونس نے اہلیہ کی حوصلہ افزائی کی اور مخاطب کرتے ہوئے لکھا کہ ڈاکٹر فریال فرض کی ادائیگی ایسے ہی نبھاتی رہو۔وقار یونس کے ٹوئٹ پر ہندوستانی ٹینس اسٹار ثانیہ مرزا نے بھی ردعمل دیا اور لکھا کہ بھابھی بہادر ہیں۔ واضح رہے کہ ڈاکٹر فریال ان دنوں آسٹریلیا کے شہر سڈنی کے ایک اسپتال میں ایمرجنسی ڈیوٹی پر مامور ہیں جبکہ ان کے شوہر وقار یونس نے پاکستان سے سڈنی پہنچ کر 14 دن کی ازخود تنہائی اختیار کی ہوئی ہے۔
