واشنگٹن۔ صدر امریکہ ڈونالڈ ٹرمپ کا کہنا ہے کہ وہ ملک میں ایک خاتوں صدر کو دیکھنا پسند کریں گے لیکن ان کے خیال میں سینیٹر کملا ہیریس ایک لائق امیدوار نہیں، ان کی بیٹی اور وائٹ ہاؤس کی سینیئر مشیر ایوانکا ٹرمپ اس عہدے کے لیے بہتر ہیں۔این ڈی ٹی وی کے مطابق نیو ہیمپشائر میں ایک ری پبلکن مہم سے خطاب کرتے ہوئے جمعہ کو ٹرمپ نے ہندوستانی نژاد سینیٹر کی قابلیت پر تنقید کی۔55 سالہ کملا ہیریس گذشتہ سال صدرارتی امیدوار تھیں لیکن انہوں نے یہ دوڑ چھوڑ دی تھی کیونکہ ان کو زیادہ حمایت حاصل نہیں ہوئی۔ ڈیموکریٹک پارٹی کے صدارتی امیدوار جو بائیڈن نے کملا ہیریس کو رواں برس 3 نومبر کو ہونے والے انتخابات کے لیے نائب صدر کے عہدے کے لیے منتخب کیا ہے جس کے بعد سے ان کا نام سیاست میں ایک بار پھر نمایاں ہوا ہے۔ کملا ہیریس کے والد جمیکن اور والدہ انڈین ہیں، اور وہ پہلی انڈین امریکی اور پہلی سیاح فام خاتون ہیں جنہیں امریکہ کی اعلیٰ سیاسی پارٹی نے ایک بڑے عہدے کے لیے منتخب کیا ہے۔ ٹرمپ کا کہنا ہے کہ ‘آپ جانتے ہیں کہ میں پہلی خاتون صدر دیکھنا چاہتا ہوں لیکن میں کسی خاتون کو اس عہدے تک ایسے پہنچتا ہوا نہیں دیکھنا چاہتا جس طرح وہ جا رہی ہیں، اور وہ لائق نہیں ہیں۔’
