نئی دہلی: این ڈی ای میں بی جے پی کی اتحادی نشاد پارٹی کے سربراہ سنجے نشاد نے اپنے بیٹے اور رکن پارلیمنٹ پروین نشاد کو مرکزی وزارتی کونسل میں شامل نہ کیے جانے پر مایوسی کا اظہار کیا ہے۔ انہوں نے پوچھا کہ جب اپنا دل کی انو پریا پٹیل کو وزارتی کونسل میں شامل کیا جا سکتا ہے تو رکن پارلیمنٹ پروین نشاد کو کیوں نہیں؟خیال رہے کہ اپنا دل کی انو پریا پٹیل کو مودی وزارتی کونسل کی توسیع میں وزیر کے طور پر حلف دلایا گیا ہے۔ نشاد پارٹی کے سربراہ کو پورا یقین تھا کہ ان کے بیٹے کو وزیر بنایا جائے گا لیکن ایسا نہیں ہو ا لہذا انہوں نے باغی تیور اختیار کر لئے ہیں۔سنجے نشاد نے کہا کہ ’’ نشاد طبقہ کے لوگ پہلے ہی بی جے پی سے کنارہ کشی اختیار کر رہے ہیں اور اگر پارٹی اپنی غلطیوں کو درست نہیں کرتی تو آئندہ اسمبلی انتخابات میں اس کے نتائج بھگتنے ہوں گے۔کانگریس، سماجوادی پارٹی اور بی ایس پی سبھی نے ہمارے طبقہ کے لوگوں کو دھوکہ دیا ہے اور اب ایسا محسوس ہو رہا ہے کہ بی جے پی انہیں دھوکہ دے رہی ہے۔‘‘
