شیلانگ، 18 مئی (یو این آئی) میگھالیہ کے نارتھ گارو ہلز ضلع میں دو نوجوانوں کو پاکستان کی حمایت کرنے پر گرفتار کیا گیا ہے ۔ایک اہلکار نے اتوار کو یہ جانکاری دی۔ عہدیدار نے بتایا کہ چوریبول بوک گاؤں کے سلگرنگ ڈی سنگما اور بجینگڈوبا پولیس اسٹیشن کے تحت چمبیلڈم گاؤں کے اسبتھ بی ماراک کو ہفتہ کو گرفتار کیا گیا۔ نارتھ گارو ہلز ضلع کے ضلعی پولیس سربراہ سوپنل پوار نے کہا کہ دونوں افراد کو سوشل میڈیا پر گارو زبان میں مذہبی نفرت انگیز پیغامات پھیلانے اور ہندوستان کے خلاف نعرے لگانے اور پاکستان کی طرف سے ہندوستان پر حملوں کی حمایت اور اکساتے ہوئے دیکھا جا سکتا ہے ۔ انہوں نے کہا کہ سلگرنگ ڈی سنگما کا ویڈیو حال ہی میں فیس بک اور واٹس ایپ جیسے پلیٹ فارم پر وائرل ہوا تھا۔انہوں نے کہاکہ “ویڈیو کا مواد ہندوستان کی خودمختاری اور سالمیت کے خلاف ہے ، خاص طور پر موجودہ حالات کی حساسیت کو دیکھتے ہوئے “۔ پولیس دونوں ملزمان سے پوچھ گچھ کر رہی ہے ۔
