نیویارک : 26اکٹوبر ( ایجنسیز ) سابق امریکی نائب صدر اور ٹرمپ کے خلاف ڈیموکریٹ صدارتی امیدوار کملا ہیریس نے ایک بار پھر صدارتی انتخاب لڑنے کا اشارہ دے دیا۔ برطانوی نشریاتی ادارے کو انٹرویو دیتے ہوئے انہوں نے کہا کہ میں نے ابھی اپنا کام مکمل نہیں کیا ہے۔ میں دوبارہ صدارتی الیکشن لڑ سکتی ہوں۔امریکہ کی سابق صدارتی امیدوار کا کہنا ہے کہ میں امکانی طور پر ایک دن امریکہ کی صدر ہوں گی اور مجھے اعتماد ہے کہ مستقبل میں وائٹ ہاؤس میں ایک خاتون صدر موجود ہو گی۔ انہوں نے ڈیموکریٹک پارٹی کے حامیوں کی رائے عامہ کے اس جائزے کو مسترد کر دیا جس کے مطابق اس بات کا امکان کم ہے کہ ڈیموکریٹک پارٹی انہیں پھر سے نامزد کرے گی۔ کملا ہیریس نے ٹرمپ کو ایک آمر قرار دیا اور کہا کہ میں نے اپنی صدارتی مہم کے دوران ٹرمپ کے بارے میں جن باتوں سے متنبہ کیا تھا وہ درست ثابت ہوئی ہیں۔
