ریاست کی بی جے پی حکومت پر پہلا حق غریبو ں اور کسانوں کا ہے
پرتھوی پور : مدھیہ پردیش کے وزیر اعلیٰ شیوراج سنگھ چوہان نے آج کہا کہ بھارتیہ جنتا پارٹی (بی جے پی) تمام طبقات کا خیال رکھتی ہے اور بلا امتیاز سب کی ترقی پر توجہ دیتی ہے ۔مسٹر چوہان نے ضلع نواڑی میں پرتھوی پور اسمبلی حلقے کے ضمنی الیکشن کے لیے سمرا میں ایک انتخابی ریلی سے خطاب کیا۔ اس موقع پر بی جے پی امیدوار شیشوپال یادو اور ریاستی حکومت کے وزراء گوپال بھارگو، ڈاکٹر پربھورام چودھری اور دیگر عوامی نمائندے بھی موجود تھے ۔وزیراعلیٰ نے خطے میں مبینہ دہشت گردی کی طرف اشارہ کرتے ہوئے کہا کہ ڈرنے کی ضرورت نہیں ہے ۔ مرکز میں نریندر مودی اور مدھیہ پردیش میں شیوراج سنگھ چوہان کی حکومت ہے جو ہر ایک کے وقار کے تحفظ پر یقین رکھتی ہے ۔ ریاست کی بی جے پی حکومت پر پہلا حق غریبوں اور کسانوں کا ہے ۔ ہم تمام طبقات کو بغیر کسی امتیاز کے ترقی دیتے ہیں۔مسٹر چوہان نے علاقے کی ترقی کے حوالے سے کہا کہ وہ جو کہتے ہیں کرکے دکھاتے ہیں۔ انہوں نے کہا تھا کہ ہر کھیت کو پانی فراہم کیا جائے گا اور اس سمت میں کام تیزی سے کیا گیا ہے ۔ انہوں نے کہا کہ انتخابات ترقی کے لیے ہیں اور یہ ترقی کی ‘ضمانت’ ہیں۔وزیر اعلیٰ نے بی جے پی امیدوار یادو سے اس علاقے سے جیتنے کی اپیل کی اور کہا کہ بی جے پی حکومت نے گزشتہ ڈیڑھ دہائیوں کے دوران ترقیاتی کام کئے ہیں۔ درمیان میں کانگریس کی حکومت 15 ماہ کے لیے آئی ، پھر اس نے ترقیاتی کام روک دیے ۔ بی جے پی حکومت کے دوبارہ قیام کے بعد ترقیاتی اور عوامی فلاحی کام شروع ہو گئے ہیں۔ انہوں نے یقین دلایا کہ بی جے پی اسی طرح عوام کی فلاح و بہبود کے لیے کام کرتی رہے گی۔انتخابی میٹنگ کے بعد چوہان دیگر انتخابی میٹنگ اور پرتھوی پور اسمبلی حلقہ میں انتخابی مہم کے لیے روانہ ہوئے ۔ اس کے بعد ، وہ آج ستنا ضلع میں رائے گاؤں اسمبلی ضمنی الیکشن میں بھی انتخابی مہم کے لیے جائیں گے ۔قبل ازیں اپنے خطاب میں بی جے پی امیدوار مسٹر یادو نے کہا کہ موجودہ ضمنی الیکشن ایک ‘راجہ’ اور‘چوکیدار’ کے درمیان ہے اور وہ خود عوام کے ‘چوکیدار’ ہیں۔