سری نگر : نیشنل کانفرنس کے صدر اور سابق وزیر اعلیٰ ڈاکٹر فاروق عبداللہ نے بظاہر بی جے پی کی طرف اشارہ کرتے ہوئے کہا کہ میں شیر کشمیر کا فرزند ہوں کسی سے ڈرنے والا ہوں نہ کسی کے سامنے سرجھکانے والا ہوں۔انہوں نے کہا کہ ہمیں ایک بڑے مقصد کیلئے الائنس بنا کر بہت بڑی قربانی دینا پڑی۔ان کا کہنا تھا کہ جو لوگ نوے کی دہائی میں کہتے تھے کہ نیشنل کانگرنس ختم ہوگئی وہ پھر میرے ہی پاؤں پکڑنے لگے ۔موصوف نے ان باتوں کا اظہار چہارشنبہ کو یہاں پارٹی ہیڈ کوارٹر نوائے صبح میں پارٹی کارکنوں سے اپنے خطاب کے دوران کیا۔انہوں نے کہا: ‘یہ لوگ سمجھتے ہیں کہ فاروق عبداللہ سر جھکائے گا میں صرف اپنے پرور دگار کے سامنے سر جھکاؤں گا، میں ڈرنے والا نہیں ہوں۔
