نئی دہلی: وزیر اعظم نریندر مودی نے کہا کہ ‘میں پیٹھ پیچھے حملہ کرنے پر یقین نہیں رکھتا۔ ہم کھل کر آمنے سامنے لڑتے ہیں۔ انہوں نے دعویٰ کیا کہ 2019 ء میں بالاکوٹ پر فضائی حملے کے بارے میں دنیا سے پہلے پاکستان کو آگاہ کیا گیا تھا۔ہندوستان میں ان دنوں قومی انتخابات کی سرگرمیاں پورے عروج پر ہیں اور یہ بات مشہور ہے کہ یہاں بلدیاتی سطح سے لے کر قومی سطح تک کے انتخابات پاکستان کے ذکر کے بغیر مکمل نہیں ہوتے۔ وزیر اعظم مودی نے جنوبی ریاست کرناٹک کے باگل کوٹ میں پیر کے روز ایک انتخابی جلسے سے خطاب کرتے ہوئے پاکستان کا ذکر کیا۔بالاکوٹ حملے کا ذکر کرتے ہوئے ہندوستانی وزیر اعظم نے کہاکہ میں نے فورسز سے کہا کہ وہ میڈیا کو فون کرکے اس واقعے کی خبر دے دیں۔ لیکن میں نے اس سے پہلے کہا تھا کہ رات کو ہونے والے فضائی حملے اور اس میں ہونے والی تباہی کے بارے میں، میں خود ٹیلی فون کے ذریعہ پاکستان کو آگاہ کروں گا، لیکن پاکستان کے لوگ فون پر نہیں آئے۔ اس لیے میں نے فورسز کو انتظار کرنے کے لیے کہا۔ اور انہیں مطلع کرنے کے بعد ہم نے رات کے وقت کیے گئے فضائی حملوں کے بارے میں دنیا کو بتایا۔”انہوں نے کہا، “اس کے بعد ہم نے ایک پریس کانفرنس کی اور اس کے حملے کے بارے میں انکشاف کیا اور دشمنوں کو ہونے والی تباہی کی تفصیلات بتائیں۔ وزیراعظم مودی نے مزید کہا کہ مودی چیزوں کو چھپاتے نہیں اور نہ ہی پیچھے سے حملہ کرتے ہیں۔ وہ ہر کام کھل کر کرتے ہیں۔ ہندوستانی وزیر اعظم نے ملک میں بے گناہ لوگوں کو ہلاک کرنے کی کوشش کرنے والوں کو بھی خبردار کیا اور کہا،”یہ نیا ہندوستان ہے۔ گھر میں گھس کر مارے گا۔ خیال رہے کہ ہندوستان کے زیر انتظام کشمیر کے پلوامہ میں ہونے والے مبینہ دہشت گرد حملے کے جواب میں ہندوستان نے 26 فروری 2019 کو پاکستان کے بالا کوٹ میں عسکریت پسند تنظیم جیش محمد کے تربیتی کیمپوں پر حملہ کیا تھا۔ پلوامہ حملے میں نیم فوجی دستے سی آر پی ایف کے چالیس جوان ہلاک ہوگئے تھے۔ لیکن اس حملے کی حقیقت پر اب بھی پردے پڑے ہوئے ہیں۔
