تھرواننتاپورم ۔ 9 ڈسمبر (سیاست ڈاٹ کام) شیوم دوبے پراعتماد ہیں کہ وہ کسی بھی میدان پر چھکا مار سکتے ہیں کیونکہ انہوں نے گذشتہ رات ویسٹ انڈیز کے خلاف دوسرے ٹوئنٹی 20 مقابلہ میں اپنے بین الاقوامی کیریئر کا آغاز کیا تاہم اس مقابلہ میں ہندوستان کو شکست ہوئی۔ کوہلی کے مقام پر نمبر 3 پر بیٹنگ کیلئے ترقی ملنے کے بعد دوبے نے 30 گیندوں میں 54 رنز اسکور کئے جس میں حریف کپتان کیرن پولارڈ کے ایک ہی اوور میں 3 چھکے شامل ہے اس کے علاوہ انہوں نے اننگز میں مجموعی طور پر چار چھکے مارے لیکن ہندوستانی ٹیم 170/3 کا کامیاب دفاع نہیں کرپائی اور ویسٹ انڈیز کی ٹیم نے یہ مقابلہ اپنے نام کرتے ہوئے سیریز کو 1-1 سے برابر کرلیا ہے جبکہ فیصلہ کن مقابلہ ہنوز باقی ہے۔ مقابلہ کے بعد اظہارخیال کرتے ہوئے دوبے نے کہا کہ میں سمجھتا ہوں کہ یہ میدان کافی بڑا ہے جس کے بعد میں کسی بھی میدان پر چھکا مارنے کی صلاحیت رکھتا ہوں۔ ابتداء میں دوبے کو چھکے مارنے میں مشکلات پیش آرہی تھیں لیکن انہوں نے اپنی ٹائمنگ کے ساتھ اسٹروکس میں توانائی کا بھی استعمال کرنا شروع کیا ہے۔ اس پر اظہارخیال کرتے ہوئے انہوں نے کہا کہ ٹیم کے نائب کپتان روہت شرما نے نوجوان کھلاڑیوں کو مشورہ دیا ہیکہ وہ پرسکون رہنے کے علاوہ اپنی طاقت کے حساب سے مظاہرہ کریں اور یہی مشورہ میرے کام آیا۔ دوبے نے مزید کہا کہ میں سمجھتا ہوں کہ مجھے نمبر3 پر بیٹنگ کیلئے جو موقع دیا گیا یہ ایک بہت بڑا موقع تھا اور بین الاقوامی سطح پر کھیلتے ہوئے بیٹنگ کے ابتدائی اوورس میں مجھ پر دباؤ ضرور تھا جس کے بعد روہت (بھائی) نے میری مدد کرنا شروع کی اور مجھے کہا کہ میں پرسکون رہتے ہوئے اپنی اصل طاقت کے مطابق مظاہرہ کروں۔ دوبے نے کہا کہ یہی وہ حوصلہ افزائی تھی جس کی مجھے ضرورت بھی تھی تاکہ میں سینئر کھلاڑی سے مشورہ لیتے ہوئے بہترمظاہرہ کرسکوں۔ ناقص فیلڈنگ اور ہم نے کیچس چھوڑے ہے اور جس کی وجہ سے مقابلہ پر اثر بھی پڑا ہے ۔
