انڈیا اتحاد کے امیدوار بی سدرشن ریڈی کو کامیاب بنانے کیلئے حکمت عملی پر غور کا امکان
نئی دہلی،7ستمبر (یو این آئی) نائب صدر جمہوریہ کے انتخاب سے پہلے کانگریس کی آج اہم میٹنگ ہوئی جس میں نائب صدر جمہوریہ کے انتخاب سے متعلق مختلف امور پر تبادلہ خیال کیا گیا۔ میٹنگ میں کانگریس لیڈروں نے کہا کہ انڈیا الائنس کے لیڈروں کی میٹنگ پیر کے روز پارلیمنٹ ہاؤس کامپلکس میں طلب کی جائے گی اور تمام قائدین سے درخواست کی جائے گی کہ تمام پارٹیاں انڈیا الائنس کے امیدوار کے حق میں ووٹ دیں اور انہیں کامیاب بنائیں۔ کانگریس کی میٹنگ میں پارٹی قائد پرمود تیواری، جے رام رمیش اور متعدد دوسرے قائدین موجود تھے ۔ بی جے پی کی طرح ووٹ ڈالنے سے پہلے اپنے ممبران پارلیمنٹ کیلئے ورکشاپ منعقد کرنے کے سوال پر، کانگریس ذرائع نے کہا کہ اتحاد کی پارلیمانی پارٹی کے قائدین کا اجلاس طلب کیا جارہا ہے اور اس میں تمام قائدین اپنے ممبران اسمبلی کو اجتماعی پیغام دیں گے ۔ ابھی میٹنگ کے وقت کا فیصلہ نہیں ہوا ہے کہ اجلاس پیر کے روز کب ہوگا۔ ذرائع نے بتایا کہ بہار میں سیٹوں کی تقسیم کے سلسلے میں بات چیت ہوئی لیکن کہا گیا کہ نائب صدر کے انتخاب کے معاملے پر کانگریس صدر ملک ارجن کھرگے کی موجودگی میں ہی غور کیا جائے گا۔ یہ اجلاس 9ستمبر کو ہونے کا امکان ہے ۔ قبل ازیں نائب صدر کے انتخاب کیلئے نمبروں کی کمی کے حوالے سے ایک سوال پر کانگریس لیڈر پرمود تیواری نے کہا کہ نائب صدر جمہوریہ کے عہدے کیلئے انتخاب کسی انتخابی نشان پر مبنی نہیں ہے ۔ یہ ضمیر کی آواز پر مبنی انتخاب ہے ۔ سابق جج بی سدرشن ریڈی نائب صدر کے عہدہ کیلئے بہتر امیدوار ہیں اور امید ہے کہ لوگ ضمیر کی آواز پر انہیں ووٹ دیں گے ۔