ابوجہ: نائیجریا کے جنوب مشرقی بینوئے ریاست میں ایک تیل کے ٹینکر میں ہوئے دھماکے سے ایک بچہ اور تین خواتین سمیت کم از کم 12 افراد ہلاک ہوگئے۔ بینوئے ریاست میں فیڈرل روڈ سیفٹی کور (ایف آر ایس سی) کے سیکٹر کمانڈر ، یعقوب محمد نے اتوار کے روز اخبار کو بتایا کہ تیل ٹینکر کے ڈرائیور نے گاڑی پر قابو کھودیا اور آگاتو کے اوشیگ بڈو گاؤں میں حادثہ کا شکار ہوگیا۔مسٹر محمد کے مطابق دھماکے اور آگ کی وجہ سے 8مرد ، 3خواتین اور ایک کمسن لڑکے سمیت 12 افراد کی موت ہوگئی ۔ ٹینکر میں آگ لگنے سے مقامی دکانات و مکانات کو بھی نقصان پہنچا ہے اور ایف آر ایس سی اور دیگر امدادی اداروں کو صورتحال پر قابو پانے کے لئے طلب کیا گیا ہے۔