والد گرامی جناب عابدعلی خاں کے زمانے سے نارائن پیٹ سے میری دلی وابستگی : جناب زاہد علی خاں ایڈیٹر سیاست
امریکن مسلم فیڈریشن ، حیات فاونڈیشن اور ڈاکٹر محمد قطب الدین کے زیر اہتمام پر وقار تقریب ، سرکردہ شخصیتوں کو تہنیت کی پیشکشی
حیدرآباد ۔ 24 ۔ فروری : ( سیاست نیوز ) ۔ نارائن پیٹ میں امریکن مسلم فیڈریشن آف انڈین ورجن اور حیات فاونڈیشن امریکہ کے اشتراک سے ڈاکٹر محمد قطب الدین کی جانب سے نارائین پیٹ ضلع مستقر میں ایک پروقار تہنیتی تقریب منعقد ہوئی ۔ دراصل نارائین پیٹ کو ضلع بنانے کی جدوجہد میں نمایاں رول اداکرنے والی سیاسی اور سماجی شخصیات کے اعزاز میں اس تقریب کا اہتمام کیا گیا۔ قابل ذکر نارائین پیٹ کے تمام پارٹیوں کے سیاسی قائدین نے اپنی اپنی سیاسی وابستگی کے باوجود بلامذہب و ملت اس تقریب میں شرکت کرتے ہوئے اتحاد کا بہترین ثبوت پیش کیا۔اور سب نے ملکرنارائین پیٹ کی ہمہ جہت ترقی کا عزم کیا۔ اس تقریب میں مقامی رکن اسمبلی جناب ایس راجندرریڈی نے تیقن دیا کہ وہ آئندہ تین سال میں نارائین پیٹ کا نقشہ بدل دیں گے اور نارائین پیٹ کو ترقی کی بلندیوں پر لے جائیں گے۔ اْنہوں نے امریکہ آفمی کی صدر پروفیسر ثنا قطب الدین کے جذباتی خطاب سے بے حد مثاثر ہونے کا اظہار کیا۔ ان سے قبل ثنا قطب الدین نے اپنے آبائی وطن سے اٹوٹ وابستگی کا اظہار کرتے ہوئے اشکبار ہوگئیں اْنہوں نے لوگوں سے اپیل کہ وہ مادہ پرستی اور خودغرضی کو چھوڑ کرانسانیت کی خدمات کے لیے آگے آئیں۔ جبکہ مہمان خصوصی کی حیثیت سے معزز شخصیت جناب نواب زاہد علی خان ایڈیٹر روزنامہ سیاست نے نارائن پیٹ سے اپنے دیرینہ وابستگی اور اس سے ان کے غیر معمولی تعلق کا اظہارکرتے ہوئے کہا کہ محبوب نگر، اور یہ علاقے، ان کے والد گرامی جناب عابد علی خان کے زمانے سے وہ واقف ہیں، اور یہاں کی علمی ثقافتی وادبی سرگرمیاں، یہاں کے عوام کا مخلصانہ طرز عمل ہمیشہ ان کے لئے دلی مسرت کا باعث رہا ہے یہی وجہ ہے کہ علیحدہ ضلع کی تحریک میں روزنامہ سیاست نے رائے عامہ کی ہمواری اور یہاں کے عوام کی آواز کو ارباب اقتدار تک پہونچانے میں اپنی ذمہ داری محسوس کرتے ہوئے نمایاں رول ادا کیا ، انہوں نے ڈاکٹر قطب الدین کا تذکرہ کرتے ہوئے کہا کہ جب بھی وہ حیدرآباد میں ہوتے ہیں سیاست دفتر ضرور آتے ہیں اور جب بھی آتے ہیں ضرور کسی نہ کسی حوالہ سے نارائن پیٹ کا تذکرہ کرکے یہاں کی سرزمین سے اپنی محبت اور گہرے تعلق کا اظہارکرتے ہیں، میری مصروفیات اور کمزوری کے باوجود انہی وجوہات کے باعث آج میں یہاں اپنے احباب کے ساتھ موجود ہوں۔ بی جے پی کے سینئر لیڈرجناب ناگو راو ناماجی نے کہا کہ نارائین پیٹ میں بھائی چارہ امن و امان کو برقرار رکھنے میں وہ ہمیشہ آگے رہے ہیں آئندہ بھی آگے رہنے کا عزم کیا۔ پروگرام کے آگنائزر ماہر نفسیات ڈاکٹر قطب الدین نے اپنے منفرد انداز میں نارائین پیٹ کے ضلع بننے پر مسرت کا اظہار کیا۔ انہوں نے نارائین پیٹ سے اپنے لگاو و الفت کا اظہارکرتے ہوئے کہا کہ وہ ہیں امریکہ میں لیکن اْن کے دل سے آنے والی ہرصدا نارائین پیٹ نارائین پیٹ کہتی ہے۔ انہوں نے اْمید ظاہر کی کہ نارائین پیٹ مستقبل میں اور ترقی کے منازل طئے کریگا۔ اس تقریب میں صدرنشین بلدیہ انوشاچندراکانت کے بشمول تمام اراکین بلدیہ، اور نارائین پیٹ ٹاون کی ممتاز شخصیتوں کو تہنیت پیش کی گئی۔ جن میں ناگو راو ناماجی، کے سدرشن ریڈی پرنسپل ، محمد نواز موسی ، عبدالسلیم ایڈوکیٹ ، امیرالدین ایڈوکیٹ ڈاکٹر تبریز تاج ، محمد تقی چاند، عبدالقادر میسور، مجاہدصدیقی نمائندہ سیاست نارائن پیٹ ، مولانا عبد القوی نمائندہ سیاست مکتھل ،حافظ محمد تقی رپورٹرودیگر شامل ہیں۔ جبکہ نارائین پیٹ سے تعلق رکھنے والے ہونہار طلب علم حبیب الرحمن کو پی ایچ ڈی کی تکمیل پر تہنیت پیش کی گئی۔ تقریب میں مہمان خصوصی کے طورپر نیوز ایڈیٹر روزنامہ سیاست جناب عامر علی خان ، ہفت روزہ گواہ کے ایڈیٹر ان چیف ڈاکٹر سید فاضل حسین پرویز، اورنگ آباد کی ممتازشخصیت مولانا مرزا عبدالقیوم ندوی، میرصدیق علی صحافی ، لکشمن صحافی ، عبدالرشید تلگو شاعر ، مولانا محمد آصف ندوی ، ودیگر نے شرکت کی بعدازں مقامی رکن اسمبلی ایس راجندر ریڈی کو ان کی عوامی خدمات کے اعتراف میں نارائین پیٹ سیوا رتن ایوارڈ سے نوازا گیا ۔ پروگرام کی کارروائی عبدالسلیم ایڈوکیٹ نے چلائی جبکہ پروگرام کے اختتام ڈاکٹر تبریز تاج کے شکریہ سے ہوا۔
