ناسک ۔ 4 اپریل (یو این آئی) ناسک ضلع کے ڈنڈوری علاقہ میں ایک ماروتی ایکس ایل 6 کار بے قابو ہو کر سڑک کنارے پانی سے بھرے کنویں میں جا گری جس کے نتیجے میں کار میں سوار 9 افراد موقع پر ہی ہلاک ہو گئے ۔ اطلاعات کے مطابق یہ حادثہ رات کے وقت پیش آیا جب گاڑی ممبئی سے جا رہی تھی اور ڈنڈوری کے قریب اچانک ڈرائیور کا کنٹرول ختم ہو گیا، جس کے بعد کار سڑک سے پھسل کر کنویں میں گر گئی۔ مہلوکین کا تعلق اندورے گاؤں کے درگوڑے خاندان سے بتایا گیا ہے ، جن میں سنیل دتاترے درگوڑے (35)، ان کی اہلیہ ریشما سنیل درگوڑے (33) اور ان کی بیٹی سمیت دیگر افراد شامل ہیں۔ حادثہ کی اطلاع ملتے ہی مقامی انتظامیہ، پولیس اور فائر بریگیڈ کی ٹیمیں فوری طور پر موقع پر پہنچ گئیں، تاہم کنویں کے پانی سے بھرے ہونے اور رات کے وقت حادثہ پیش آنے کی وجہ سے ریسکیو آپریشن میں ابتدائی مشکلات پیش آئیں۔ بعد ازاں کرین اور ڈیزاسٹر مینجمنٹ ٹیم کی مدد سے کار اور تمام لاشوں کو کنویں سے باہر نکال لیا گیا۔ مہلوکین میں راکھی، آشا، مادھوری اور شروانی درگوڑے کے علاوہ تین بچے ۔ سروشتی (16)، شریاش (11) اور سمردھی۔ (7) بھی شامل ہیں، جن کی عمریں 7 سے 16 سال کے درمیان ہیں۔ اس حادثہ کے بعد پورے گاؤں میں غم کی فضا پھیل گئی ہے ۔
