ممبئی: مہاراشٹرا کے ناسک میں گؤ رکھشکوں نے سلاخوں سے حملہ کرکے ایک اور مسلم نوجوان کی جان لے لی۔ اطلاعات کے مطابق ممبئی کے قریبی علاقہ اگت پوری میں یہ واقعہ پیش آیا۔ اس واقعہ میں اور ایک نوجوان شدید طور پر زخمی ہوگیا۔ ہلاک نوجوان کی شناخت عبدالمجید انصاری جبکہ زخمی شخص کی شناخت ناصر کے طور پر کی گئی۔ سنار۔ گھوٹی ہائی وے پر دو مسلم نوجوانون کار میں ممبئی کی طرف جارہے تھے کہ دس سے زائد اشرار پر مشتمل ہجوم نے غیرقانونی طور پر ان کی گاڑی کو روکا اور کار کی تلاشی لی۔ دونوں پر گائے کا گوشت لیجانے کاالزام عائد کرتے ہوئے گؤ رکھشکوں نے ان پر مبینہ طور پر لوہے کی سلاخوں سے حملہ کردیا اور بری طرح مارپیٹ کی۔پولیس نے بتایا کہ دو مسلم نوجوانوں کو ہاسپٹل منتقل کیا گیا جہاں علاج کے دوران ایک نوجوان ہلاک ہوگیا۔ دوسرے نوجوان کا علاج چل رہاہے۔
اس سلسلہ میں پولیس نے مقدمہ درج کرکے تحقیقات کا آغاز کردیا ہے۔ایک اور اطلاع کے مطابق پولیس نے نامعلوم افراد کے خلاف قتل اور جھگڑے کا معاملہ درج کرلیا اور فوری طور پر کاروائی کرتے ہوئے 10 افراد کو حراست میں لے لیا گیا ۔موقع پر پائے گئے گوشت کو پولیس نے جانچ کیلئے لیاب بھیج دیا ہے۔ رپورٹ آنے کے بعد مزید کاروائی کی جائے گی۔
