14 افراد زخمی، چار کی حالت تشویشناک، امدادی کام جاری
ناسک : مہا راشٹرا کے ناسک میں آج اتوار یکم جنوری 2023 کو ایک فیکٹری میں زبردست آگ لگ گئی ہے۔ جس میں کم از کم 2 افراد ہلاک اور 14 دیگر افراد زخمی ہو گئے، جن میں سے چار کی حالت نازک بتائی گئی ہے۔ حکام نے بتایا کہ مزید دو افراد کے پھنسے ہونے کا خدشہ ہے۔ فائر ٹینڈرز موقع پر پہنچ گئے اور اعلیٰ حکام صورتحال کا جائزہ لے رہے ہیں۔ فضائیہ کا ایک ہیلی کاپٹر بھی امدادی کارروائیوں کے لیے تعینات کر دیا گیا ہے۔علاقہ کے مکینوں نے زور دار دھماکے کی آواز سنی اور جائے وقوعہ سے دھویں کے بڑے بادل اٹھتے دیکھے گئے۔ فیکٹری سے دھوئیں کے بڑے بادل نکلتے ہوئے ایک ویڈیو سوشل میڈیا پلیٹ فارمز پر گردش کر رہی تھی۔ناسک کی اگت پوری تحصیل کے منڈے گاؤں میں جندل گروپ کے پولی تھین مینوفیکچرنگ یونٹ میں صبح تقریباً 11 بجے آگ بھڑک اٹھی۔ آگ کیمیکل پلانٹ کے اندر موجود بوائلر سے لگی۔ ایک زخمی خاتون کو ہاسپٹل لایا گیا جہاں وہ زخموں کی تاب نہ لاتے ہوئے چل بسی۔مہاراشٹرا کے وزیر اعلیٰ ایکناتھ شندے نے حرکت میں آتے ہوئے کہا کہ زخمیوں اور اندر پھنسے لوگوں کو ہر ممکن مدد فراہم کی جارہی ہے۔ وہ ذاتی طور پر صورتحال کی نگرانی کر رہے ہیں۔