ماسکو: صدر ولادیمیر پوٹن نے کہا ہیکہ اگر سویڈن اور فن لینڈ ناٹو میں شامل ہوتے ہیں تو روس کو کوئی خطرہ نہیں ہے۔ تاہم ناٹو کی فوجی تنصیبات ان ممالک میں نہیں ہونی چاہیے۔پوٹن نے خبردار کیا کہ امریکی قیادت میں اگر ناٹو نے فن لینڈ یا سویڈن میں فوجی انفراسٹرکچر کو مضبوط بنانے کی کوشش کی تو روس بھرپور جواب دے گا۔ پوٹن جنہوں نے حالیہ مہینوں میں مغرب کو نیوکلیئر حملوں کی دھمکی سے جھنجھوڑ کر رکھ دیا ہے، فن لینڈ اور سویڈن کی ناٹو میں شمولیت کے فیصلوں پر غیرمعمولی طور پر اطمینان کا مظاہرہ کیا ہے۔پوٹن نے کہا کہ روس کو فن لینڈ اور سویڈن کے ناٹو میں شامل ہونے پر کوئی اعتراض نہیں، لہٰذا ان ممالک کی شمولیت سے (ناٹو کی) توسیع بھی روس کیلئے فوری خطرے کا باعث نہیں ہے لیکن ان ممالک میں ناٹو کی فوجی تنصیبات یقینی طور پر ہمارے ردعمل کو بھڑکا دے گی۔
