برسلز : ناٹونے جدید فوجی ٹیکنالوجی کے حصول کی لیے نانو ویشن فنڈ قائم کر دیا۔ اس فنڈ میں ایک ارب یورو کی سرمایہ کاری کے ذریعے جدید ٹیکنالوجی پر کام کیا جائے گا۔ اس بات کا اعلان ناٹوکے سیکرٹری جنرل ژینس اسٹولٹن برگ نے ناٹووزرائے دفاع کے 2روزہ اجلاس کے اختتام پر ایک پریس کانفرنس سے خطاب کرتے ہوئے کیا۔ انہوں نے کہا کہ ناٹوشمالی بحر اوقیانوس کے لیے ’ڈیفنس انو ویشن ایکسیلیریٹر فار دی نارتھ اٹلانٹک ‘قائم کر رہا ہے ، جو ہماری سلامتی کے لیے اختیارات کو بہتر طریقے سے استعمال کرنے کے لیے ٹیکنالوجی ٹیسٹ مراکز اور ایکسیلیریٹر سائٹس کا نیٹ ورک فراہم کرے گا۔ خبررساں اداروں کے مطابق ناٹووزرائے دفاع نے ناٹوکی پہلی مصنوعی ذہانت کی حکمت عملی پر بھی اتفاق کیا ہے ، جس میں بین الاقوامی قانون کے مطابق مصنوعی ذہانت کے ذمے دارانہ استعمال کے معیارات شامل ہیں۔ اس اجلاس میں وزرا نے ناٹوکے قریبی شراکت داروں فن لینڈ، سوئیڈن اور یورپی حکام سے بھی ملاقاتیں کیں ، تاکہ عالمی چیلنجوں سے نمٹنے کے لیے تعاون میں مزید اضافہ کیا جا سکے۔ دوسری جانب اجلاس میں شریک امریکی وزیر دفاع لائیڈ آسٹن نے شرکاسے کہا کہ ناٹوکے تمام شراکت داروں کو افغانستان کے تجربہ سے سیکھنے کی ضرورت ہے۔
