واشنگٹن : امریکہ کے صدر جو بائیڈن نے کہا ہے کہ موجودہ اسرائیلی حکومت کے ہوتے ہوئے بھی اسرائیل اور فلسطین کے درمیان دو ریاستی حل ممکن ہے۔ بائیڈن نے یہ بات اسرائیلی وزیراعظم سے ٹیلی فون پر بات چیت کے بعد میڈیا سے کہی۔ صدر بائیڈن سے پوچھا گیا تھا کہ آیا وہ سمجھتے ہیں کہ اسرائیلی وزیراعظم بن یامین نتن یاہو کے اقتدار میں ہوتے ہوئے دو ریاستی حل ناممکن ہے، اس پر امریکی صدر نے کہا کہ نہیں، ایسا نہیں ہے۔ اس سے پہلے اسرائیلی وزیراعظم نے غزہ پر مسلط جنگ کے خاتمہ پر آزاد فلسطینی ریاست کا قیام مسترد کردیا تھا۔ نتن یاہو نے کہا تھا کہ اسرائیل کو پورے خطہ پر سیکورٹی کنٹرول کی ضرورت ہوگی جو کہ خود مختاری کے نظریہ سے براہ راست ٹکراؤ کی بات ہے۔