ممبئی ۔ 18 ڈسمبر (ایجنسیز) معروف نغمہ نگار اور اسکرین رائٹر جاوید اختر نے بہار کے وزیراعلیٰ نتیش کمار پر شدید تنقید کرتے ہوئے پٹنہ میں پیش آئے ایک واقعہ کی سخت الفاظ میں مذمت کی ہے جس میںچیف منسٹر نے ایک مسلم خاتون ڈاکٹر کا حجاب ہٹایا ۔ جاوید اختر نے جمعرات کو ایکس پر ایک واضح اور دوٹوک پیغام میں کہا کہ اگرچہ وہ ذاتی طور پر پردے کے روایتی تصور کے ناقد ہیں، تاہم کسی خاتون کی ذاتی حدود اور خودمختاری کی خلاف ورزی کسی بھی نظریاتی اختلاف کا جواز نہیں بن سکتی۔انہوں نے اپنے بیان میں کہا کہ نتیش کمار کا یہ عمل ناقابلِ قبول ہے ۔ ساتھ ہی انہوں نے وزیراعلیٰ سے مطالبہ کیا کہ وہ متاثرہ مسلم خاتون ڈاکٹر سے غیر مشروط معافی مانگیں۔اس ویڈیو کے منظرِ عام پر آنے کے بعد عوامی غصہ تیزی سے بڑھا اور متعدد شخصیات نے اسے خواتین کی عزت، مذہبی آزادی اور ذاتی وقار کی خلاف ورزی قرار دیا۔ ناقدین کا کہنا ہے کہ ایک آئینی عہدے پر فائز شخص سے اس طرح کے رویے کی توقع نہیں کی جا سکتی۔تاحال نتیش کمار یا بہار حکومت کی جانب سے اس معاملے پر کوئی باضابطہ بیان یا معافی سامنے نہیں آئی ہے، تاہم بڑھتی ہوئی تنقید کے پیش نظر سیاسی دباؤ میں اضافہ ہوتا جا رہا ہے۔