پٹنہ : بہار کے وزیر اعلیٰ نتیش کمار نے کل اپنے متنازعہ بیان کے لیے آج اسمبلی میں معافی مانگ لی، لیکن ان کے استعفیٰ کے مطالبے پر ڈٹے ہوئے اپوزیشن کے زور دار ہنگامے کی وجہ سے اسمبلی کی کارروائی تقریباً 14 منٹ بعد ہی 2 بجے دن تک ملتوی کرنی پڑی۔وزیر اعلیٰ نتیش کمار نے چہارشنبہ کو اسمبلی میں کہا کہ کل کے اپنے بیان کے حوالے سے یہاں آنے سے پہلے ہی انہوں نے پریس کو وضاحت دے دی ہے ۔ بہار میں خواتین کی تعلیم پر کتنا زور دیا جا رہا ہے ۔ کل ہی ہم نے بتادیا کہ تعلیم پر زور دینے کی وجہ سے فرٹیلیٹی شرح کم ہوئی ہے ۔ یہ خوشی کی بات ہے ۔ لڑکا لڑکی میں اگر لڑکی میٹرک پاس ہے تو ملک میں فرٹیلیٹی شرح دو اور بہار میں بھی دو ہے ، لیکن اگر لڑکی انٹرمیڈیٹ پاس کرجاتی ہے تو ملک میں فرٹیلیٹی شرح 1.7 اور بہار میں 1.6 ہے ۔مسٹر کمار نے کہا، “اسی لیے ہم نے خواتین کی تعلیم پر زور دیا۔ آج خواتین بہت زیادہ تعلیم حاصل کر رہی ہیں۔ اگر خواتین کو میری کسی بات سے کوئی مسئلہ ہے ، تو میں اپنے الفاظ واپس لیتا ہوں اور خود اپنی مذمت کرتا ہوں۔