نئی دہلی9جنوری (سیاست ڈاٹ کام ) پورے ملک کو دہلا دینے والے نربھئے اجتماعی آبروریزی اور قتل معاملے کے چار قصورواروں میں سے ایک ونئے شرما نے جمعرات کے روز سپریم کورٹ میں کیورٹیو پٹیشن داخل کی۔ونے نے اپنی درخواست میں پھانسی نہ دیئے جانے کا مطالبہ کیا ہے ۔پٹیالہ ہاؤس کورٹ کی طرف سے گزشتہ دنوں چاروں مجرموں کو پھانسی کی سزا کے لئے منگل کے روز ‘بلیک وارنٹ’ (ڈیتھ وارنٹ) جاری کئے جانے کے بعد یہ پہلی پٹیشن ہے ۔پٹیالہ ہاؤس عدالت نے چاروں مجرموں کو 22 جنوری کی صبح سات بجے تہاڑ جیل میں پھانسی دینے کا حکم دیا تھا۔ فیصلے کے بعد سبھی قصورواروں نے سپریم کورٹ کے سامنے کیوریٹو عرضی داخل کرنے کی بات کہی تھی۔نچلی عدالت میں سماعت کے دوران استغاثہ نے کہا تھا کہ اب کسی بھی مجرم کی کوئی بھی درخواست کسی بھی عدالت میں یا صدر کے سامنے زیر التوا نہیں ہے ۔ سبھی قصورواروں کی نظر ثانی کی عرضیاں عدالت نے مسترد کر دی تھیں۔استغاثہ نے عدالت سے ڈیتھ وارنٹ جاری کرنے کی اپیل کرتے ہوئے کہا تھا کہ’’ڈیتھ وارنٹ جاری کرنے اور تعمیل کرنے کی مدت کے درمیان مجرم اصلاحی عرضی دائر کرنا چاہتے ہیں تو کر سکتے ہیں‘‘۔
