7 سالہ دورحکومت میں بینکوں میں دھوکہ دہی کے واقعات میں اضافہ
نئی دہلی: کانگریس نے کہا ہیکہ وزیر اعظم نریندر مودی کی زیرقیادت بی جے پی کی 7 سالہ حکمرانی کے دوران بینکوں میں فراڈ تیزی سے بڑھا اور حکومت ٹھگوں کے خلاف کارروائی کرنے میں ناکام رہی، جس کی وجہ سے ملک میں بینکاری نظام بری طرح تباہ ہوگیا ہے۔ کانگریس کے ترجمان گورو ولبھ نے پیر کو پریس کانفرنس میں کہا کہ ریزرو بینک نے اپنی سالانہ رپورٹ جاری کی ہے ۔ رپورٹ کے اہم حصے میں بینکوں میں فراڈ کا اعداد و شمار درج کرتے ہوئے ریزرو بینک نے کہا ہیکہ پچھلے 7 برسوں کے دوران بینکوں میں 1.38 لاکھ کروڑ روپئے کا فراڈ ہوا ہے ۔ ولبھ نے کہا کہ بینکاری فراڈ کے معاملات میں اس اضافہ کی وجہ حکومت کی بے حسی ہے ، جس کی وجہ سے دھوکہ دینے والوں کو حوصلہ ملا اور بینکوں کا نظام چوپٹ ہوگیاہے ۔ حکومت بینکوں سے ہونے والے فراڈ کو روکنے میں ناکام رہی ہے اور اس فراڈ کی رقم کی وصولی کیلئے کوئی اقدام نہیں کیاہے ۔کانگریس کے ترجمان نے کہا کہ حکومت کو یہ بتانا چاہئے کہ ہمارے بینکنگ نظام کو کمزور کرنے والے ان دھوکہ بازوں سے اب تک کتنی رقم وصول کی گئی ہے ۔ انہوں نے کہا کہ حکومت نے بینکوں سے فراڈ کے ذریعہ لی گئی رقم کی وصولی کیلئے کوئی کوشش نہیں کی اور ٹھگوں کو ملک میں اپنا کام جاری رکھنے یا ملک سے فرار ہونے کا موقع دیکر بینکنگ سسٹم کو ناکارہ بنادیا ہے۔