نئی دہلی: ہندوستانی کپتان ویراٹ کوہلی اپنے پہلے بچے کی ولادت کے سبب آسٹریلیا سے ملک واپس آئے ہوئے ہیں لیکن سڈنی میں تیسرے ٹسٹ میں کچھ شائقین کے ہندوستانی کھلاڑیوں پر نسلی تبصرے کرنے کے سلسلے میں وہ کافی ناراض ہیں۔ ویراٹ نے اس معاملے میں ناراضگی ظاہر کرتے ہوئے اتوار کو ٹوئٹ کرکے کہا ‘‘نسلی تبصروں کو قطعی طور پر تسلیم نہیں کیا جاسکتا۔ باؤنڈری پر فیلڈنگ کرتے وقت کئی بار ایسے حالات سے گزرا ہوں۔ یہ شائقین کے غلط رویئے کی انتہا ہے ۔ یہ دیکھنا افسوسناک ہے کہ میدان پر ایسے واقعات ہوئے ہیں۔‘‘ سڈنی میں تیسرے ٹسٹ کے تیسرے اور چوتھے روز شائقین کے ایک طبقے نے جسپریت بمراہ اور محمد سراج پر نسلی تبصرے کئے ۔ ہندوستانی ٹیم نے تیسرے دن کے کھیل کے بعد اس معاملے میں باضابطہ طور پر شکایت درج کرائی ہے ۔ اتوار کو چوتھے دن یہ واقعہ پھرسے پیش آنے پر سراج نے امپائروں کو توجہ اس جانب مبذول کرائی جس کے بعد کچھ دیر کے لئے کھیل روکا گیا۔ چھ شائقین کو اسٹیڈیم سے باہر کردیا گیا اور دن کے کھیل کے بعد ہندوستانی آف اسپنر روی چندرن اشون نے بھی کہا کہ ایسے واقعات سے سختی سے نمٹا جانا چاہیے تاکہ انہیں روکا جاسکے ۔ ویراٹ نے ایک دیگر ٹوئٹ میں کہا ’’اس واقعہ کو سنجیدگی سے لئے جانے کی ضرورت ے اور ایسے لوگوں کے خلاف سخت کارروائی کرنے کی ضرورت ہے تاکہ انہیں ہمیشہ کے لئے روکا جاسکے ۔‘‘
