دبئی۔23 جنوری (سیاست ڈاٹ کام ) جنوبی افریقہ کے خلاف میچ کے دوران سرفراز احمد کے مبینہ نسل پرستانہ جملے نے تنازعہ کھڑا کر دیا۔ آئی سی سی نے نوٹس لے لیا اور اب پاکستانی کپتان سرفرازکو سزا کا خدشہ ہے۔ سرفراز احمد ضابطے کی خلاف ورزی کے مرتکب قرار پائے تو انہیں سزا کا سامنا کرنا پڑ سکتا ہے۔ پاکستان کرکٹ ٹیم کے کپتان سرفراز احمد جنوبی افریقہ کے خلاف 5 ونڈے میچزکی سیریز کے دوسرے میچ میں شکست کو سامنے دیکھ کر زبان پر قابو نہ رکھ پائے۔ سوشل میڈیا پر سامنے آنے والے ایک ویڈیو میں مبینہ طور پر سرفراز احمد جنوبی افریقہ کے سیاہ فام کھلاڑی اینڈیلے پھیکوایو کے بارے میں تضحیک آمیز جملے ادا کر رہے ہیں، جس کے بعد کرکٹ شائقین انہیں آڑے ہاتھوں لے رہے ہیں۔ سرفراز احمد کے مبینہ نسل پرستانہ جملے ان کے لیے مشکلات کا سبب بن سکتے ہیں۔ کیوںکہ انٹرنیشنل کرکٹ کونسل اس حوالے سے سخت مؤقف رکھتی ہے۔ سرفراز نسل پرستی کے مرتکب قرار پائے تو انہیں سزا ہوسکتی ہے۔ اینڈیلے پھیکوایو نے پانچویں وکٹ پر شاندار بیٹنگ کرتے ہوئے اپنی ٹیم کو فتح سے دلوائی تھی۔سرفراز نے جو جملے کہے ہیں انہیں یہاں تحریر بھی نہیں کیا جاسکتا لیکن انہوں نے حریف سیاہ فام کھلاڑی کو ’’کالے اور ان کی ماں پر بھی جملے کہے۔
ہیڈ اور کمنز ٹسٹ ٹیم کے نائب کپتان
سڈنی۔23 جنوری (سیاست ڈاٹ کام )کرکٹ آسٹریلیا نے سری لنکا کیخلاف شروع ہونے والی ہوم ٹسٹ سیریز کیلئے ٹریوس ہیڈ اور پیٹ کمنز کو مشترکہ طور پر نائب کپتان مقرر کردیا جو مچل مارش اور جوش ہیزل ووڈ کی جگہ ذمہ داریاں نبھائیں گے۔ واضح رہے کہ جوش ہیزل ووڈ فٹنس مسائل کے باعث سیریز سے باہر ہو گئے جبکہ مچل مارش ٹیم میں جگہ بنانے میں ناکام رہے۔