لاہور۔ 9 ڈسمبر (سیاست ڈاٹ کام ) پاکستان کے 16 سالہ نسیم شاہ نے حال ہی میں آسٹریلیا کے خلاف کرئیر کا آغازکیا تھا۔ اس کے بعد سے ان کی عمرپرمسلسل سوال کئے جارہے ہیں۔ اب پاکستان کے ہی سابق وکٹ کیپراورکپتان راشد لطیف نے عمرمیں شبہات پر پی سی بی پر سوال اٹھائے ہیں۔ انہوں نے ٹوئٹ کرکے پی سی بی کومشورہ دیا کہ وہ خود کا مذاق نہ اڑائے۔ نسیم شاہ نے آسٹریلیا کے خلاف گزشتہ ماہ ٹسٹ ڈیبیوکیا تھا۔ اس کے بعد اس ہفتے انہیں انڈر19 ورلڈکپ کیلئے ٹیم میں شامل کیا گیا ہے۔ ایسا بہت کم ہوتا ہے، جب بین الاقوامی سطح پرکرئیر کا آغاز کے بعد کھلاڑی ایج گروپ ٹیموں میں کھیلے۔ پاکستان کے جونیئرسلیکٹروں نے جنوبی افریقہ میں17 جنوری سے9 فروری تک چلنے والے ٹورنمنٹ کیلئے ٹیم کا انتخاب کیا۔ راشد لطیف نے نسیم شاہ کے انتخاب کے بعد ٹوئٹ کیا۔ پاکستانی کھلاڑی انڈر19 کھیلنے جارہے ہیں، انڈر19 کھلاڑی انڈر16 کھیلنے جارہے ہیں، انڈر16 انڈر13 کھیل رہے ہیں اورانڈر13 کھیلنے والے واپس اپنے ماں کی گود میں۔ خدا کے لئے پی سی بی ان کی صحیح عمربتائے۔ فرضی ڈپلومہ ڈاکٹروں کے ساتھ مل کر تباہ نہ کریں، اور مذاق نہ بنوائیں۔
