افتتاحی پروگرام میں مقامی نمائندوں کو نظر انداز کرنے ایم پی ڈی اروند پر الزام
نظام آباد:19/جنوری(سیاست ڈسٹرکٹ نیوز) نظام آباد میں ہلدی بورڈ کے قیام کا سابق رکن پارلیمنٹ و رکن قانون ساز کونسل بی آر ایس نظام آباد کے کویتا نے نے خیر مقدم کیا ۔ آج ضلع بی آر ایس پارٹی آ فس نظام آباد میں رکن اسمبلی بالکنڈہ مسٹر پرشانت ریڈی، باجی ریڈی گوردھن سابقہ اراکین اسمبلی اور دیگر قائدین کے ہمراہ صحافیوں سے بات چیت کرتے ہوئے کے کویتا نے ہلدی بورڈ کے افتتاح کے موقع پر ریاستی حکومت اور مقامی نمائندوں کو نظرانداز کرتے ہوئے بی جے پی کے رکن اسمبلی بی جے پی کے وزرا کے ہمراہ تقریب کے انعقاد پر شدید تنقید کی۔انہوں نے بی جے پی کے رکن پارلیمنٹ ڈی اروند پر الزام عائد کیا کہ وہ ہلدی اور مصالحہ جات بورڈ کے حوالے سے کئے گئے وعدے پورے نہیں کئے ہیں اور ان کے بیانات میں تضاد پایا جاتا ہے۔ کے کویتا نے کہا کہ بی جے پی کو سیاسی ڈراموں کے بجائے کسانوں کی فلاح و بہبود کو ترجیح دینی چاہئے اور ہلدی کاشتکاروں کی فی الوقت مدد کو یقینی بنانا چاہئے۔انہوں نے بتایا کہ کے سی آر حکومت نے مصالحہ جات پارک اور جکران پلی ایئرپورٹ کے لئے زمین مختص کی تھی لیکن یہ مسئلہ ابھی تک زیر التوا ہے۔ انہوں نے کہا کہ جب ہلدی کا موسم ہوتا ہے توقیمتیں خود بخود کسانوں کے مسائل کا حل بن جاتی ہیں۔ یہ واقعی زرد سونا ہے۔ لیکن غیر موسمی حالات میں انہیں ہماری سب سے زیادہ ضرورت ہوتی ہے اور یہی وہ وقت ہے جب مناسب اقل ترین قیمت کی اشد ضرورت ہوتی ہے۔ انہوں نے حکومت اوراپوزیشن دونوں سے اپیل کی کہ وہ کسانوں کی فلاح و بہبود کو یقینی بنانے کے لیے متحدہ کام کریں۔ کویتا نے پرزور انداز میں کہا کہ اجتماعی کوششوں کے بغیر کسانوں کو حقیقی فائدہ حاصل نہیں ہوسکتا۔کویتا نے ہلدی کے کسانوں کے لئے اپنی طویل جدوجہد کا ذکر کیا اور ہلدی کے کسانوں کے ساتھ اپنی دیرینہ وابستگی کا تذکرہ کیا۔نرملا سیتا رامن کو مکتوبات تحریر کئے۔ دو مرتبہ وزیراعظم سے ملاقات کی اور مصالحہ جات پارک اور ہلدی پر مبنی صنعتوں کے قیام کے لیے دباؤ ڈالا۔ وہ طویل عرصے سے ہلدی کے لئے 15,000 روپئے اقل ترین امدادی قیمت کا مطالبہ کر رہی ہیں اور آج پھر اس مطالبہ کا اعادہ کررہی ہیں۔انہوں نے کہا کہ کانگریس حکومت کو نظام آباد میں ہلدی پر مبنی صنعتوں کے قیام پر توجہ مرکوز کر نی چاہئے تاکہ روزگار کے مواقع پیدا ہوں ضلع کی ترقی ممکن ہوسکے۔ اس موقع پر سابق ریاستی وزیر پرشانت ریڈی،سابق رکن اسمبلی باجی ریڈی گوردھن،میئر نظام آباد نیتو کرن،سابق صدر نشین ریڈکو ایس اے علیم،صدر بی آر ایس ضلع اقلیتی سل نوید اقبال کے علاوہ دیگر بھی موجود تھے ۔
