سرکاری عہدیدار، مقامی معززین کی شرکت،تمام ریکارڈس محفوظ
بودھن ۔ سابق نظام شوگر فیکٹری شکر نگر بودھن یونٹ کے اثاثہ جات کے نگرانکار محمد خالد علی چھ ماہ قبل مرض کوویڈ 19 سے متاثر ہونے کے بعد حیدرآباد کے ایک کارپوریٹ ہاسپٹل میں علاج کے دوران ان کا انتقال ہوگیا۔ ان کے گذر جانے کے بعد ضلع انتظامیہ کی ہدایت پر ان کے دفتر میں موجود الماریوں کو سیل ( مہر بند ) کردیا گیا تھا اور مرحوم کی مخلوعہ جگہ پر ایک موظف تحصیلدار وشواناتھم کا بحیثیت انچارج کور کمیٹی این ایس ایف تقرر عمل میں لایا گیا۔ وشواناتھم نے ہفتہ کے روز اعلیٰ عہدیداروں کی ہدایت پر مقفل دو الماریوں کے تالے کھول کر اس میں موجود ریکارڈس اور نقد رقم تقریباً ایک لاکھ روپئے برآمد کئے۔ذرائع کے مطابق مرحوم جامع مسجد شکر نگر اور اے آر پی کیمپ مسجد کی انتظامی کمیٹی کے صدر تھے ۔ وہ مساجد کے ریکارڈس اور جمع رقم وغیرہ اپنے دفتر ہی میں محفوظ رکھا کرتے تھے۔ الماریوں کی کشادگی اور ریکارڈس و رقم کی بازیابی کے موقع پر سرکاری عہدیدار اور مقامی معزز افراد کے علاوہ مرحوم کے رشتہ دار بھی موجود تھے۔
