بی جے پی قائدین کے اشتعال انگیز بیانات کو پارلیمنٹ میں اٹھانے کا عزم، فلموں کو نفرت پھیلانے کیلئے استعمال کرنے پر اظہار تشویش
نئی دہلی: ملک کے موجودہ حالات پر تشویش کا اظہار کرتے ہوئے آل انڈیا کانگریس کمیٹی (شعبہ اقلیت) کے چیرمین اور رکن پارلیمنٹ عمران پرتاپ گڑھی نے کہاکہ نفرت کی عمر بہت چھوٹی ہوتی ہے ، یہ شکست سے دوچار ہوگی اور محبت فتحیاب ہوگی۔ یہ بات انہوں نے اپنی رہائش گاہ پر منعقدہ میڈیا کی افطار پارٹی سے غیر رسمی بات چیت کرتے ہوے کہی۔ انہوں نے ناگپور میں ہونے والے حالیہ فساد کے پس منظر میں کہا کہ اس سلسلے میں وہاں کے رہنما، وزراء کس طرح کے بیانات دے رہے تھے یہ سب کو پتہ ہے ۔ انہوں نے کہاکہ بے گناہوں کو گرفتار کرنے سے بہتر ہے کہ خاطیوں کو سزادی جائے ۔ انہوں نے کہاکہ اس سلسلے میں پہلے سے اشتعال انگیز بیانات دئے جارہے تھے ۔ اس پر کوئی کارروائی نہیں کی گئی اور معاملے کو بگڑنے دیا گیا۔انہوں نے کہاکہ وزراء اور رہنماؤں کے اشتعال انگیزبیانات کو وہ پارلیمنٹ میں اٹھائیں گے اور بی جے پی کے صدر سے پوچھیں گے کیا آپ یا دیگر لیڈر اپنے گھر میں ایسے بیان سن سکتے ہیں یا مہذب سماج اسے سن سکتا ہے۔ امید ظاہر کرتے ہوئے انہوں نے کہاکہ یہ نفرت کا کاروبار ہے جو بہت دنوں تک نہیں چلے گا اور بالآخر پیار، امن اور محبت کی دکان ضرورت کھلے گی اور لوگ آپس میں پیا ر و محبت سے رہیں گے اور گنگا جمنی تہذیب کا بول بالا ہوگا۔ معروف شاعر مسٹر عمران نے افسوس کا اظہار کرتے ہوئے کہا کہ فلمیں جو تفریح اور دل بہلانے کا ذریعہ ہوا کرتی تھیں نفرت پھیلانے کا ذریعہ بنتی جارہی ہیں اور ایک خاص طبقہ اسے نفرت پھیلانے کے لئے ٹول کٹ کے طور پر استعمال کرتا ہے ۔ انہوں نے کہاکہ عوام کو اس سلسلے میں سوچنا ہوگا کہ فلم کوتفریح کا ذریعہ بنانا چاہتے ہیں یا نفرت پھیلانے کا ذریعہ۔انہوں نے کہاکہ اس کو ختم کرنے کے لئے سب کو ایک ساتھ مل کر آنا ہوگا۔ کانگریس کے نیشنل میڈیا کوآرڈی نیٹر اور میڈیا افطار کے منتظم سید عدنان اشرف نے کہاکہ میڈیا والوں کے ساتھ افطار سے ایک الگ طرح کا تجربہ ہوتا ہے ، سب سے اہم بات یہ ہے کہ ان کے ساتھ بہت سارے مسائل زیر بحث آجاتے ہیں جو عام طور چھوٹ جاتے ہیں۔ انہوں نے کہاکہ وقف ترمیمی بل کے سلسلے میں ہماری پارٹی پوری طرح مسلمانوں کے ساتھ ہیں اور ہر سطح پر اس بل کی مخالفت کی جائے گی۔