ریاض : سعودی عرب کے دار الحکومت ریاض میں ماہرین نے نفسیاتی صحت کے لیے مختص ہاسپٹل کے قیام کے سلسلے میں اقتصادی ممکن العمل مطالعہ مکمل کر لیا ہے۔ دواخانہ میں نشے کے امراض کا علاج کیا جائے گا اور نفسیاتی بحالی پروگراموں کے علاوہ نفسیاتی اور سماجی مشاورت بھی پیش کی جائے گی۔ سعودی عرب میں 180 بستروں کی گنجائش کے ساتھ یہ اپنی نوعیت کا پہلا ہاسپٹل ہو گا۔ اس پر 40.8 کروڑ ریال کی مجموعی لاگت آئے گی۔ہاسپٹل میں خصوصی نگہداشت کے کمروں، طبی کلینکوں اور خواتین، مرد اور نوجوانوں کے لیے نفسیاتی وارڈوں کے علاوہ جنرل اور پرائیوٹ روم بھی ہوں گے۔ ذرائع کے مطابق ہاسپٹل کے لیے ممکن العمل مطالعہ ایک مشاورتی کمپنی نے انجام دیا۔ کمپنی کی رپورٹ میں اس منصوبے کو سرمایہ کاری کا ایک بڑا موقع قرار دیا گیا۔ مملکت میں نشے اور نفسیاتی امراض کے علاج کے لیے خانگی دواخانے موجود نہیں ہیں۔منصوبے کے لیے کام کرنے والی ٹیم میں انسداد منشیات اور سول انجینئرنگ سے تعلق رکھنے والے ماہرین کے علاوہ مالیاتی اور انتظامی مشیر، فارمیسی اور لیبارٹریز کے شعبے کے ماہرین اور نشے اور نفسیاتی طب کے ماہر معالجین شامل ہیں۔
