پٹنہ۔ 18 ڈسمبر (ایجنسیز) چیف منسٹر بہار نتیش کمار کی جانب سے ایک سرکاری تقریب کے دوران مسلم خاتون ڈاکٹر کا نقاب کھینچنے کے واقعہ نے نیا رخ اختیار کر لیا ہے۔ متاثرہ ڈاکٹر نصرت پروین نے سرکاری ملازمت جوائن کرنے سے انکار کر دیا اور کہا کہ جو کچھ ان کے ساتھ ہوا وہ ان کیلئے توہین کے مترادف ہے۔ یہ واقعہ پیر کے روز وزیراعلیٰ سکریٹریٹ کے ’سَمواَد‘ ہال میں پیش آیا جہاں نتیش کمار 1283 ڈاکٹروں کو تقررنامے دے رہے تھے۔ اسی دوران انہوں نے AYUSH ڈاکٹر نصرت پروین کا نقاب نیچے کھینچتے ہوئے سوال کیا کہ یہ کیا ہے، جس پر تقریب میں موجود بعض افراد ہنستے دکھائی دیئے۔ واقعہ کے بعد نصرت پروین کولکاتہ چلی گئیں، جہاں وہ اپنے بڑے بھائی کے ساتھ مقیم ہیں۔ ان کے بھائی جو کولکاتہ کی ایک سرکاری لا یونیورسٹی میں پروفیسر ہیں نے بتایا کہ خاندان ڈاکٹر نصرت کو ملازمت جوائن کرنے پر آمادہ کرنے کی کوشش کر رہا ہے مگر وہ ذہنی طور پر شدید دلبرداشتہ ہیں۔اس واقعہ پر کانگریس، آر جے ڈی، سماجوادی پارٹی، نیشنل کانفرنس اور پی ڈی پی سمیت کئی سیاسی جماعتوں نے نتیش کمار کو شدید تنقید کا نشانہ بنایا۔ جموں و کشمیر کے وزیراعلیٰ عمر عبداللہ نے کہا کہ کسی بھی صورت میں کسی مسلمان خاتون کا نقاب ہٹانا ناقابلِ جواز ہے۔